चौपाई
सुनि मुनि बचन भरत हिंय सोचू। भयउ कुअवसर कठिन सँकोचू।।
जानि गरुइ गुर गिरा बहोरी। चरन बंदि बोले कर जोरी।।
सिर धरि आयसु करिअ तुम्हारा। परम धरम यहु नाथ हमारा।।
भरत बचन मुनिबर मन भाए। सुचि सेवक सिष निकट बोलाए।।
चाहिए कीन्ह भरत पहुनाई। कंद मूल फल आनहु जाई।।
भलेहीं नाथ कहि तिन्ह सिर नाए। प्रमुदित निज निज काज सिधाए।।
मुनिहि सोच पाहुन बड़ नेवता। तसि पूजा चाहिअ जस देवता।।
सुनि रिधि सिधि अनिमादिक आई। आयसु होइ सो करहिं गोसाई।।
दोहा/सोरठा
राम बिरह ब्याकुल भरतु सानुज सहित समाज।
पहुनाई करि हरहु श्रम कहा मुदित मुनिराज।।213।।
चौपाई
रिधि सिधि सिर धरि मुनिबर बानी। बड़भागिनि आपुहि अनुमानी।।
कहहिं परसपर सिधि समुदाई। अतुलित अतिथि राम लघु भाई।।
मुनि पद बंदि करिअ सोइ आजू। होइ सुखी सब राज समाजू।।
अस कहि रचेउ रुचिर गृह नाना। जेहि बिलोकि बिलखाहिं बिमाना।।
भोग बिभूति भूरि भरि राखे। देखत जिन्हहि अमर अभिलाषे।।
दासीं दास साजु सब लीन्हें। जोगवत रहहिं मनहि मनु दीन्हें।।
सब समाजु सजि सिधि पल माहीं। जे सुख सुरपुर सपनेहुँ नाहीं।।
प्रथमहिं बास दिए सब केही। सुंदर सुखद जथा रुचि जेही।।
दोहा/सोरठा
बहुरि सपरिजन भरत कहुँ रिषि अस आयसु दीन्ह।
बिधि बिसमय दायकु बिभव मुनिबर तपबल कीन्ह।।214।।
चौपाई
suni muni bacana bharata hiṃya sōcū. bhayau kuavasara kaṭhina saomkōcū..
jāni garui gura girā bahōrī. carana baṃdi bōlē kara jōrī..
sira dhari āyasu karia tumhārā. parama dharama yahu nātha hamārā..
bharata bacana munibara mana bhāē. suci sēvaka siṣa nikaṭa bōlāē..
cāhiē kīnha bharata pahunāī. kaṃda mūla phala ānahu jāī..
bhalēhīṃ nātha kahi tinha sira nāē. pramudita nija nija kāja sidhāē..
munihi sōca pāhuna baḍa nēvatā. tasi pūjā cāhia jasa dēvatā..
suni ridhi sidhi animādika āī. āyasu hōi sō karahiṃ gōsāī..
चौपाई
ridhi sidhi sira dhari munibara bānī. baḍabhāgini āpuhi anumānī..
kahahiṃ parasapara sidhi samudāī. atulita atithi rāma laghu bhāī..
muni pada baṃdi karia sōi ājū. hōi sukhī saba rāja samājū..
asa kahi racēu rucira gṛha nānā. jēhi bilōki bilakhāhiṃ bimānā..
bhōga bibhūti bhūri bhari rākhē. dēkhata jinhahi amara abhilāṣē..
dāsīṃ dāsa sāju saba līnhēṃ. jōgavata rahahiṃ manahi manu dīnhēṃ..
saba samāju saji sidhi pala māhīṃ. jē sukha surapura sapanēhuom nāhīṃ..
prathamahiṃ bāsa diē saba kēhī. suṃdara sukhada jathā ruci jēhī..
