चौपाई
जड़ चेतन मग जीव घनेरे। जे चितए प्रभु जिन्ह प्रभु हेरे।।
ते सब भए परम पद जोगू। भरत दरस मेटा भव रोगू।।
यह बड़ि बात भरत कइ नाहीं। सुमिरत जिनहि रामु मन माहीं।।
बारक राम कहत जग जेऊ। होत तरन तारन नर तेऊ।।
भरतु राम प्रिय पुनि लघु भ्राता। कस न होइ मगु मंगलदाता।।
सिद्ध साधु मुनिबर अस कहहीं। भरतहि निरखि हरषु हियँ लहहीं।।
देखि प्रभाउ सुरेसहि सोचू। जगु भल भलेहि पोच कहुँ पोचू।।
गुर सन कहेउ करिअ प्रभु सोई। रामहि भरतहि भेंट न होई।।
दोहा/सोरठा
रामु सँकोची प्रेम बस भरत सपेम पयोधि।
बनी बात बेगरन चहति करिअ जतनु छलु सोधि।।217।।
चौपाई
बचन सुनत सुरगुरु मुसकाने। सहसनयन बिनु लोचन जाने।।
मायापति सेवक सन माया। करइ त उलटि परइ सुरराया।।
तब किछु कीन्ह राम रुख जानी। अब कुचालि करि होइहि हानी।।
सुनु सुरेस रघुनाथ सुभाऊ। निज अपराध रिसाहिं न काऊ।।
जो अपराधु भगत कर करई। राम रोष पावक सो जरई।।
लोकहुँ बेद बिदित इतिहासा। यह महिमा जानहिं दुरबासा।।
भरत सरिस को राम सनेही। जगु जप राम रामु जप जेही।।
दोहा/सोरठा
मनहुँ न आनिअ अमरपति रघुबर भगत अकाजु।
अजसु लोक परलोक दुख दिन दिन सोक समाजु।।218।।
चौपाई
jaḍa cētana maga jīva ghanērē. jē citaē prabhu jinha prabhu hērē..
tē saba bhaē parama pada jōgū. bharata darasa mēṭā bhava rōgū..
yaha baḍai bāta bharata kai nāhīṃ. sumirata jinahi rāmu mana māhīṃ..
bāraka rāma kahata jaga jēū. hōta tarana tārana nara tēū..
bharatu rāma priya puni laghu bhrātā. kasa na hōi magu maṃgaladātā..
siddha sādhu munibara asa kahahīṃ. bharatahi nirakhi haraṣu hiyaom lahahīṃ..
dēkhi prabhāu surēsahi sōcū. jagu bhala bhalēhi pōca kahuom pōcū..
gura sana kahēu karia prabhu sōī. rāmahi bharatahi bhēṃṭa na hōī..
चौपाई
bacana sunata suraguru musakānē. sahasanayana binu lōcana jānē..
māyāpati sēvaka sana māyā. karai ta ulaṭi parai surarāyā..
taba kichu kīnha rāma rukha jānī. aba kucāli kari hōihi hānī..
sunu surēsa raghunātha subhāū. nija aparādha risāhiṃ na kāū..
jō aparādhu bhagata kara karaī. rāma rōṣa pāvaka sō jaraī..
lōkahuom bēda bidita itihāsā. yaha mahimā jānahiṃ durabāsā..
bharata sarisa kō rāma sanēhī. jagu japa rāma rāmu japa jēhī..
