चौपाई
राम राम रट बिकल भुआलू। जनु बिनु पंख बिहंग बेहालू।।
हृदयँ मनाव भोरु जनि होई। रामहि जाइ कहै जनि कोई।।
उदउ करहु जनि रबि रघुकुल गुर। अवध बिलोकि सूल होइहि उर।।
भूप प्रीति कैकइ कठिनाई। उभय अवधि बिधि रची बनाई।।
बिलपत नृपहि भयउ भिनुसारा। बीना बेनु संख धुनि द्वारा।।
पढ़हिं भाट गुन गावहिं गायक। सुनत नृपहि जनु लागहिं सायक।।
मंगल सकल सोहाहिं न कैसें। सहगामिनिहि बिभूषन जैसें।।
तेहिं निसि नीद परी नहि काहू। राम दरस लालसा उछाहू।।
दोहा/सोरठा
द्वार भीर सेवक सचिव कहहिं उदित रबि देखि।
जागेउ अजहुँ न अवधपति कारनु कवनु बिसेषि।।37।।
चौपाई
पछिले पहर भूपु नित जागा। आजु हमहि बड़ अचरजु लागा।।
जाहु सुमंत्र जगावहु जाई। कीजिअ काजु रजायसु पाई।।
गए सुमंत्रु तब राउर माही। देखि भयावन जात डेराहीं।।
धाइ खाइ जनु जाइ न हेरा। मानहुँ बिपति बिषाद बसेरा।।
पूछें कोउ न ऊतरु देई। गए जेंहिं भवन भूप कैकैई।।
कहि जयजीव बैठ सिरु नाई। दैखि भूप गति गयउ सुखाई।।
सोच बिकल बिबरन महि परेऊ। मानहुँ कमल मूलु परिहरेऊ।।
सचिउ सभीत सकइ नहिं पूँछी। बोली असुभ भरी सुभ छूछी।।
दोहा/सोरठा
परी न राजहि नीद निसि हेतु जान जगदीसु।
रामु रामु रटि भोरु किय कहइ न मरमु महीसु।।38।।
चौपाई
rāma rāma raṭa bikala bhuālū. janu binu paṃkha bihaṃga bēhālū..
hṛdayaom manāva bhōru jani hōī. rāmahi jāi kahai jani kōī..
udau karahu jani rabi raghukula gura. avadha bilōki sūla hōihi ura..
bhūpa prīti kaikai kaṭhināī. ubhaya avadhi bidhi racī banāī..
bilapata nṛpahi bhayau bhinusārā. bīnā bēnu saṃkha dhuni dvārā..
paḍhahiṃ bhāṭa guna gāvahiṃ gāyaka. sunata nṛpahi janu lāgahiṃ sāyaka..
maṃgala sakala sōhāhiṃ na kaisēṃ. sahagāminihi bibhūṣana jaisēṃ..
tēhiṃ nisi nīda parī nahi kāhū. rāma darasa lālasā uchāhū..
चौपाई
pachilē pahara bhūpu nita jāgā. āju hamahi baḍa acaraju lāgā..
jāhu sumaṃtra jagāvahu jāī. kījia kāju rajāyasu pāī..
gaē sumaṃtru taba rāura māhī. dēkhi bhayāvana jāta ḍērāhīṃ..
dhāi khāi janu jāi na hērā. mānahuom bipati biṣāda basērā..
pūchēṃ kōu na ūtaru dēī. gaē jēṃhiṃ bhavana bhūpa kaikaiī..
kahi jayajīva baiṭha siru nāī. daikhi bhūpa gati gayau sukhāī..
sōca bikala bibarana mahi parēū. mānahuom kamala mūlu pariharēū..
saciu sabhīta sakai nahiṃ pūomchī. bōlī asubha bharī subha chūchī..
