चौपाई
एक कलस भरि आनहिं पानी। अँचइअ नाथ कहहिं मृदु बानी।।
सुनि प्रिय बचन प्रीति अति देखी। राम कृपाल सुसील बिसेषी।।
जानी श्रमित सीय मन माहीं। घरिक बिलंबु कीन्ह बट छाहीं।।
मुदित नारि नर देखहिं सोभा। रूप अनूप नयन मनु लोभा।।
एकटक सब सोहहिं चहुँ ओरा। रामचंद्र मुख चंद चकोरा।।
तरुन तमाल बरन तनु सोहा। देखत कोटि मदन मनु मोहा।।
दामिनि बरन लखन सुठि नीके। नख सिख सुभग भावते जी के।।
मुनिपट कटिन्ह कसें तूनीरा। सोहहिं कर कमलिनि धनु तीरा।।
दोहा/सोरठा
जटा मुकुट सीसनि सुभग उर भुज नयन बिसाल।
सरद परब बिधु बदन बर लसत स्वेद कन जाल।।115।।
चौपाई
बरनि न जाइ मनोहर जोरी। सोभा बहुत थोरि मति मोरी।।
राम लखन सिय सुंदरताई। सब चितवहिं चित मन मति लाई।।
थके नारि नर प्रेम पिआसे। मनहुँ मृगी मृग देखि दिआ से।।
सीय समीप ग्रामतिय जाहीं। पूँछत अति सनेहँ सकुचाहीं।।
बार बार सब लागहिं पाएँ। कहहिं बचन मृदु सरल सुभाएँ।।
राजकुमारि बिनय हम करहीं। तिय सुभायँ कछु पूँछत डरहीं।
स्वामिनि अबिनय छमबि हमारी। बिलगु न मानब जानि गवाँरी।।
राजकुअँर दोउ सहज सलोने। इन्ह तें लही दुति मरकत सोने।।
दोहा/सोरठा
स्यामल गौर किसोर बर सुंदर सुषमा ऐन।
सरद सर्बरीनाथ मुखु सरद सरोरुह नैन।।116।।
चौपाई
ēka kalasa bhari ānahiṃ pānī. aomcaia nātha kahahiṃ mṛdu bānī..
suni priya bacana prīti ati dēkhī. rāma kṛpāla susīla bisēṣī..
jānī śramita sīya mana māhīṃ. gharika bilaṃbu kīnha baṭa chāhīṃ..
mudita nāri nara dēkhahiṃ sōbhā. rūpa anūpa nayana manu lōbhā..
ēkaṭaka saba sōhahiṃ cahuom ōrā. rāmacaṃdra mukha caṃda cakōrā..
taruna tamāla barana tanu sōhā. dēkhata kōṭi madana manu mōhā..
dāmini barana lakhana suṭhi nīkē. nakha sikha subhaga bhāvatē jī kē..
munipaṭa kaṭinha kasēṃ tūnīrā. sōhahiṃ kara kamalini dhanu tīrā..
चौपाई
barani na jāi manōhara jōrī. sōbhā bahuta thōri mati mōrī..
rāma lakhana siya suṃdaratāī. saba citavahiṃ cita mana mati lāī..
thakē nāri nara prēma piāsē. manahuom mṛgī mṛga dēkhi diā sē..
sīya samīpa grāmatiya jāhīṃ. pūomchata ati sanēhaom sakucāhīṃ..
bāra bāra saba lāgahiṃ pāēom. kahahiṃ bacana mṛdu sarala subhāēom..
rājakumāri binaya hama karahīṃ. tiya subhāyaom kachu pūomchata ḍarahīṃ.
svāmini abinaya chamabi hamārī. bilagu na mānaba jāni gavāomrī..
rājakuaomra dōu sahaja salōnē. inha tēṃ lahī duti marakata sōnē..
