चौपाई
सादर पुनि पुनि पूँछति ओही। सबरी गान मृगी जनु मोही।।
तसि मति फिरी अहइ जसि भाबी। रहसी चेरि घात जनु फाबी।।
तुम्ह पूँछहु मैं कहत डेराऊँ। धरेउ मोर घरफोरी नाऊँ।।
सजि प्रतीति बहुबिधि गढ़ि छोली। अवध साढ़साती तब बोली।।
प्रिय सिय रामु कहा तुम्ह रानी। रामहि तुम्ह प्रिय सो फुरि बानी।।
रहा प्रथम अब ते दिन बीते। समउ फिरें रिपु होहिं पिंरीते।।
भानु कमल कुल पोषनिहारा। बिनु जल जारि करइ सोइ छारा।।
जरि तुम्हारि चह सवति उखारी। रूँधहु करि उपाउ बर बारी।।
दोहा/सोरठा
तुम्हहि न सोचु सोहाग बल निज बस जानहु राउ।
मन मलीन मुह मीठ नृप राउर सरल सुभाउ।।17।।
चौपाई
चतुर गँभीर राम महतारी। बीचु पाइ निज बात सँवारी।।
पठए भरतु भूप ननिअउरें। राम मातु मत जानव रउरें।।
सेवहिं सकल सवति मोहि नीकें। गरबित भरत मातु बल पी कें।।
सालु तुम्हार कौसिलहि माई। कपट चतुर नहिं होइ जनाई।।
राजहि तुम्ह पर प्रेमु बिसेषी। सवति सुभाउ सकइ नहिं देखी।।
रची प्रंपचु भूपहि अपनाई। राम तिलक हित लगन धराई।।
यह कुल उचित राम कहुँ टीका। सबहि सोहाइ मोहि सुठि नीका।।
आगिलि बात समुझि डरु मोही। देउ दैउ फिरि सो फलु ओही।।
दोहा/सोरठा
रचि पचि कोटिक कुटिलपन कीन्हेसि कपट प्रबोधु।।
कहिसि कथा सत सवति कै जेहि बिधि बाढ़ बिरोधु।।18।।
चौपाई
sādara puni puni pūomchati ōhī. sabarī gāna mṛgī janu mōhī..
tasi mati phirī ahai jasi bhābī. rahasī cēri ghāta janu phābī..
tumha pūomchahu maiṃ kahata ḍērāūom. dharēu mōra gharaphōrī nāūom..
saji pratīti bahubidhi gaḍhai chōlī. avadha sāḍhasātī taba bōlī..
priya siya rāmu kahā tumha rānī. rāmahi tumha priya sō phuri bānī..
rahā prathama aba tē dina bītē. samau phirēṃ ripu hōhiṃ piṃrītē..
bhānu kamala kula pōṣanihārā. binu jala jāri karai sōi chārā..
jari tumhāri caha savati ukhārī. rūomdhahu kari upāu bara bārī..
चौपाई
catura gaombhīra rāma mahatārī. bīcu pāi nija bāta saomvārī..
paṭhaē bharatu bhūpa naniaurēṃ. rāma mātu mata jānava raurēṃ..
sēvahiṃ sakala savati mōhi nīkēṃ. garabita bharata mātu bala pī kēṃ..
sālu tumhāra kausilahi māī. kapaṭa catura nahiṃ hōi janāī..
rājahi tumha para prēmu bisēṣī. savati subhāu sakai nahiṃ dēkhī..
racī praṃpacu bhūpahi apanāī. rāma tilaka hita lagana dharāī..
yaha kula ucita rāma kahuom ṭīkā. sabahi sōhāi mōhi suṭhi nīkā..
āgili bāta samujhi ḍaru mōhī. dēu daiu phiri sō phalu ōhī..
