चौपाई
चक्क चक्कि जिमि पुर नर नारी। चहत प्रात उर आरत भारी।।
जागत सब निसि भयउ बिहाना। भरत बोलाए सचिव सुजाना।।
कहेउ लेहु सबु तिलक समाजू। बनहिं देब मुनि रामहिं राजू।।
बेगि चलहु सुनि सचिव जोहारे। तुरत तुरग रथ नाग सँवारे।।
अरुंधती अरु अगिनि समाऊ। रथ चढ़ि चले प्रथम मुनिराऊ।।
बिप्र बृंद चढ़ि बाहन नाना। चले सकल तप तेज निधाना।।
नगर लोग सब सजि सजि जाना। चित्रकूट कहँ कीन्ह पयाना।।
सिबिका सुभग न जाहिं बखानी। चढ़ि चढ़ि चलत भई सब रानी।।
दोहा/सोरठा
सौंपि नगर सुचि सेवकनि सादर सकल चलाइ।
सुमिरि राम सिय चरन तब चले भरत दोउ भाइ।।187।।
चौपाई
राम दरस बस सब नर नारी। जनु करि करिनि चले तकि बारी।।
बन सिय रामु समुझि मन माहीं। सानुज भरत पयादेहिं जाहीं।।
देखि सनेहु लोग अनुरागे। उतरि चले हय गय रथ त्यागे।।
जाइ समीप राखि निज डोली। राम मातु मृदु बानी बोली।।
तात चढ़हु रथ बलि महतारी। होइहि प्रिय परिवारु दुखारी।।
तुम्हरें चलत चलिहि सबु लोगू। सकल सोक कृस नहिं मग जोगू।।
सिर धरि बचन चरन सिरु नाई। रथ चढ़ि चलत भए दोउ भाई।।
तमसा प्रथम दिवस करि बासू। दूसर गोमति तीर निवासू।।
दोहा/सोरठा
पय अहार फल असन एक निसि भोजन एक लोग।
करत राम हित नेम ब्रत परिहरि भूषन भोग।।188।।
चौपाई
cakka cakki jimi pura nara nārī. cahata prāta ura ārata bhārī..
jāgata saba nisi bhayau bihānā. bharata bōlāē saciva sujānā..
kahēu lēhu sabu tilaka samājū. banahiṃ dēba muni rāmahiṃ rājū..
bēgi calahu suni saciva jōhārē. turata turaga ratha nāga saomvārē..
aruṃdhatī aru agini samāū. ratha caḍhai calē prathama munirāū..
bipra bṛṃda caḍhai bāhana nānā. calē sakala tapa tēja nidhānā..
nagara lōga saba saji saji jānā. citrakūṭa kahaom kīnha payānā..
sibikā subhaga na jāhiṃ bakhānī. caḍhai caḍhai calata bhaī saba rānī..
चौपाई
rāma darasa basa saba nara nārī. janu kari karini calē taki bārī..
bana siya rāmu samujhi mana māhīṃ. sānuja bharata payādēhiṃ jāhīṃ..
dēkhi sanēhu lōga anurāgē. utari calē haya gaya ratha tyāgē..
jāi samīpa rākhi nija ḍōlī. rāma mātu mṛdu bānī bōlī..
tāta caḍhahu ratha bali mahatārī. hōihi priya parivāru dukhārī..
tumharēṃ calata calihi sabu lōgū. sakala sōka kṛsa nahiṃ maga jōgū..
sira dhari bacana carana siru nāī. ratha caḍhai calata bhaē dōu bhāī..
tamasā prathama divasa kari bāsū. dūsara gōmati tīra nivāsū..
