चौपाई
सिय सोभा नहिं जाइ बखानी। जगदंबिका रूप गुन खानी।।
उपमा सकल मोहि लघु लागीं। प्राकृत नारि अंग अनुरागीं।।
सिय बरनिअ तेइ उपमा देई। कुकबि कहाइ अजसु को लेई।।
जौ पटतरिअ तीय सम सीया। जग असि जुबति कहाँ कमनीया।।
गिरा मुखर तन अरध भवानी। रति अति दुखित अतनु पति जानी।।
बिष बारुनी बंधु प्रिय जेही। कहिअ रमासम किमि बैदेही।।
जौ छबि सुधा पयोनिधि होई। परम रूपमय कच्छप सोई।।
सोभा रजु मंदरु सिंगारू। मथै पानि पंकज निज मारू।।
दोहा/सोरठा
एहि बिधि उपजै लच्छि जब सुंदरता सुख मूल।
तदपि सकोच समेत कबि कहहिं सीय समतूल।।247।।
चौपाई
चलिं संग लै सखीं सयानी। गावत गीत मनोहर बानी।।
सोह नवल तनु सुंदर सारी। जगत जननि अतुलित छबि भारी।।
भूषन सकल सुदेस सुहाए। अंग अंग रचि सखिन्ह बनाए।।
रंगभूमि जब सिय पगु धारी। देखि रूप मोहे नर नारी।।
हरषि सुरन्ह दुंदुभीं बजाई। बरषि प्रसून अपछरा गाई।।
पानि सरोज सोह जयमाला। अवचट चितए सकल भुआला।।
सीय चकित चित रामहि चाहा। भए मोहबस सब नरनाहा।।
मुनि समीप देखे दोउ भाई। लगे ललकि लोचन निधि पाई।।
दोहा/सोरठा
गुरजन लाज समाजु बड़ देखि सीय सकुचानि।।
लागि बिलोकन सखिन्ह तन रघुबीरहि उर आनि।।248।।
चौपाई
siya sōbhā nahiṃ jāi bakhānī. jagadaṃbikā rūpa guna khānī..
upamā sakala mōhi laghu lāgīṃ. prākṛta nāri aṃga anurāgīṃ..
siya barania tēi upamā dēī. kukabi kahāi ajasu kō lēī..
jau paṭataria tīya sama sīyā. jaga asi jubati kahāom kamanīyā..
girā mukhara tana aradha bhavānī. rati ati dukhita atanu pati jānī..
biṣa bārunī baṃdhu priya jēhī. kahia ramāsama kimi baidēhī..
jau chabi sudhā payōnidhi hōī. parama rūpamaya kacchapa sōī..
sōbhā raju maṃdaru siṃgārū. mathai pāni paṃkaja nija mārū..
चौपाई
caliṃ saṃga lai sakhīṃ sayānī. gāvata gīta manōhara bānī..
sōha navala tanu suṃdara sārī. jagata janani atulita chabi bhārī..
bhūṣana sakala sudēsa suhāē. aṃga aṃga raci sakhinha banāē..
raṃgabhūmi jaba siya pagu dhārī. dēkhi rūpa mōhē nara nārī..
haraṣi suranha duṃdubhīṃ bajāī. baraṣi prasūna apacharā gāī..
pāni sarōja sōha jayamālā. avacaṭa citaē sakala bhuālā..
sīya cakita cita rāmahi cāhā. bhaē mōhabasa saba naranāhā..
muni samīpa dēkhē dōu bhāī. lagē lalaki lōcana nidhi pāī..
