चौपाई
दरस परस मज्जन अरु पाना। हरइ पाप कह बेद पुराना।।
नदी पुनीत अमित महिमा अति। कहि न सकइ सारद बिमलमति।।
राम धामदा पुरी सुहावनि। लोक समस्त बिदित अति पावनि।।
चारि खानि जग जीव अपारा। अवध तजे तनु नहि संसारा।।
सब बिधि पुरी मनोहर जानी। सकल सिद्धिप्रद मंगल खानी।।
बिमल कथा कर कीन्ह अरंभा। सुनत नसाहिं काम मद दंभा।।
रामचरितमानस एहि नामा। सुनत श्रवन पाइअ बिश्रामा।।
मन करि विषय अनल बन जरई। होइ सुखी जौ एहिं सर परई।।
रामचरितमानस मुनि भावन। बिरचेउ संभु सुहावन पावन।।
त्रिबिध दोष दुख दारिद दावन। कलि कुचालि कुलि कलुष नसावन।।
रचि महेस निज मानस राखा। पाइ सुसमउ सिवा सन भाषा।।
तातें रामचरितमानस बर। धरेउ नाम हियँ हेरि हरषि हर।।
कहउँ कथा सोइ सुखद सुहाई। सादर सुनहु सुजन मन लाई।।
दोहा/सोरठा
जस मानस जेहि बिधि भयउ जग प्रचार जेहि हेतु।
अब सोइ कहउँ प्रसंग सब सुमिरि उमा बृषकेतु।।35।।
चौपाई
संभु प्रसाद सुमति हियँ हुलसी। रामचरितमानस कबि तुलसी।।
करइ मनोहर मति अनुहारी। सुजन सुचित सुनि लेहु सुधारी।।
सुमति भूमि थल हृदय अगाधू। बेद पुरान उदधि घन साधू।।
बरषहिं राम सुजस बर बारी। मधुर मनोहर मंगलकारी।।
लीला सगुन जो कहहिं बखानी। सोइ स्वच्छता करइ मल हानी।।
प्रेम भगति जो बरनि न जाई। सोइ मधुरता सुसीतलताई।।
सो जल सुकृत सालि हित होई। राम भगत जन जीवन सोई।।
मेधा महि गत सो जल पावन। सकिलि श्रवन मग चलेउ सुहावन।।
भरेउ सुमानस सुथल थिराना। सुखद सीत रुचि चारु चिराना।।
दोहा/सोरठा
सुठि सुंदर संबाद बर बिरचे बुद्धि बिचारि।
तेइ एहि पावन सुभग सर घाट मनोहर चारि।।36।।
चौपाई
darasa parasa majjana aru pānā. harai pāpa kaha bēda purānā..
nadī punīta amita mahimā ati. kahi na sakai sārada bimalamati..
rāma dhāmadā purī suhāvani. lōka samasta bidita ati pāvani..
cāri khāni jaga jīva apārā. avadha tajē tanu nahi saṃsārā..
saba bidhi purī manōhara jānī. sakala siddhiprada maṃgala khānī..
bimala kathā kara kīnha araṃbhā. sunata nasāhiṃ kāma mada daṃbhā..
rāmacaritamānasa ēhi nāmā. sunata śravana pāia biśrāmā..
mana kari viṣaya anala bana jaraī. hōi sukhī jau ēhiṃ sara paraī..
rāmacaritamānasa muni bhāvana. biracēu saṃbhu suhāvana pāvana..
tribidha dōṣa dukha dārida dāvana. kali kucāli kuli kaluṣa nasāvana..
raci mahēsa nija mānasa rākhā. pāi susamau sivā sana bhāṣā..
tātēṃ rāmacaritamānasa bara. dharēu nāma hiyaom hēri haraṣi hara..
kahauom kathā sōi sukhada suhāī. sādara sunahu sujana mana lāī..
चौपाई
saṃbhu prasāda sumati hiyaom hulasī. rāmacaritamānasa kabi tulasī..
karai manōhara mati anuhārī. sujana sucita suni lēhu sudhārī..
sumati bhūmi thala hṛdaya agādhū. bēda purāna udadhi ghana sādhū..
baraṣahiṃ rāma sujasa bara bārī. madhura manōhara maṃgalakārī..
līlā saguna jō kahahiṃ bakhānī. sōi svacchatā karai mala hānī..
prēma bhagati jō barani na jāī. sōi madhuratā susītalatāī..
sō jala sukṛta sāli hita hōī. rāma bhagata jana jīvana sōī..
mēdhā mahi gata sō jala pāvana. sakili śravana maga calēu suhāvana..
bharēu sumānasa suthala thirānā. sukhada sīta ruci cāru cirānā..
