चौपाई
समाचार सब संकर पाए। बीरभद्रु करि कोप पठाए।।
जग्य बिधंस जाइ तिन्ह कीन्हा। सकल सुरन्ह बिधिवत फलु दीन्हा।।
भे जगबिदित दच्छ गति सोई। जसि कछु संभु बिमुख कै होई।।
यह इतिहास सकल जग जानी। ताते मैं संछेप बखानी।।
सतीं मरत हरि सन बरु मागा। जनम जनम सिव पद अनुरागा।।
तेहि कारन हिमगिरि गृह जाई। जनमीं पारबती तनु पाई।।
जब तें उमा सैल गृह जाईं। सकल सिद्धि संपति तहँ छाई।।
जहँ तहँ मुनिन्ह सुआश्रम कीन्हे। उचित बास हिम भूधर दीन्हे।।
दोहा/सोरठा
सदा सुमन फल सहित सब द्रुम नव नाना जाति।
प्रगटीं सुंदर सैल पर मनि आकर बहु भाँति।।65।।
चौपाई
सरिता सब पुनित जलु बहहीं। खग मृग मधुप सुखी सब रहहीं।।
सहज बयरु सब जीवन्ह त्यागा। गिरि पर सकल करहिं अनुरागा।।
सोह सैल गिरिजा गृह आएँ। जिमि जनु रामभगति के पाएँ।।
नित नूतन मंगल गृह तासू। ब्रह्मादिक गावहिं जसु जासू।।
नारद समाचार सब पाए। कौतुकहीं गिरि गेह सिधाए।।
सैलराज बड़ आदर कीन्हा। पद पखारि बर आसनु दीन्हा।।
नारि सहित मुनि पद सिरु नावा। चरन सलिल सबु भवनु सिंचावा।।
निज सौभाग्य बहुत गिरि बरना। सुता बोलि मेली मुनि चरना।।
दोहा/सोरठा
त्रिकालग्य सर्बग्य तुम्ह गति सर्बत्र तुम्हारि।।
कहहु सुता के दोष गुन मुनिबर हृदयँ बिचारि।।66।।
चौपाई
samācāra saba saṃkara pāē. bīrabhadru kari kōpa paṭhāē..
jagya bidhaṃsa jāi tinha kīnhā. sakala suranha bidhivata phalu dīnhā..
bhē jagabidita daccha gati sōī. jasi kachu saṃbhu bimukha kai hōī..
yaha itihāsa sakala jaga jānī. tātē maiṃ saṃchēpa bakhānī..
satīṃ marata hari sana baru māgā. janama janama siva pada anurāgā..
tēhi kārana himagiri gṛha jāī. janamīṃ pārabatī tanu pāī..
jaba tēṃ umā saila gṛha jāīṃ. sakala siddhi saṃpati tahaom chāī..
jahaom tahaom muninha suāśrama kīnhē. ucita bāsa hima bhūdhara dīnhē..
चौपाई
saritā saba punita jalu bahahīṃ. khaga mṛga madhupa sukhī saba rahahīṃ..
sahaja bayaru saba jīvanha tyāgā. giri para sakala karahiṃ anurāgā..
sōha saila girijā gṛha āēom. jimi janu rāmabhagati kē pāēom..
nita nūtana maṃgala gṛha tāsū. brahmādika gāvahiṃ jasu jāsū..
nārada samācāra saba pāē. kautukahīṃ giri gēha sidhāē..
sailarāja baḍa ādara kīnhā. pada pakhāri bara āsanu dīnhā..
nāri sahita muni pada siru nāvā. carana salila sabu bhavanu siṃcāvā..
nija saubhāgya bahuta giri baranā. sutā bōli mēlī muni caranā..
