चौपाई
तदपि एक मैं कहउँ उपाई। होइ करै जौं दैउ सहाई।।
जस बरु मैं बरनेउँ तुम्ह पाहीं। मिलहि उमहि तस संसय नाहीं।।
जे जे बर के दोष बखाने। ते सब सिव पहि मैं अनुमाने।।
जौं बिबाहु संकर सन होई। दोषउ गुन सम कह सबु कोई।।
जौं अहि सेज सयन हरि करहीं। बुध कछु तिन्ह कर दोषु न धरहीं।।
भानु कृसानु सर्ब रस खाहीं। तिन्ह कहँ मंद कहत कोउ नाहीं।।
सुभ अरु असुभ सलिल सब बहई। सुरसरि कोउ अपुनीत न कहई।।
समरथ कहुँ नहिं दोषु गोसाई। रबि पावक सुरसरि की नाई।।
दोहा/सोरठा
जौं अस हिसिषा करहिं नर जड़ि बिबेक अभिमान।
परहिं कलप भरि नरक महुँ जीव कि ईस समान।।69।।
चौपाई
सुरसरि जल कृत बारुनि जाना। कबहुँ न संत करहिं तेहि पाना।।
सुरसरि मिलें सो पावन जैसें। ईस अनीसहि अंतरु तैसें।।
संभु सहज समरथ भगवाना। एहि बिबाहँ सब बिधि कल्याना।।
दुराराध्य पै अहहिं महेसू। आसुतोष पुनि किएँ कलेसू।।
जौं तपु करै कुमारि तुम्हारी। भाविउ मेटि सकहिं त्रिपुरारी।।
जद्यपि बर अनेक जग माहीं। एहि कहँ सिव तजि दूसर नाहीं।।
बर दायक प्रनतारति भंजन। कृपासिंधु सेवक मन रंजन।।
इच्छित फल बिनु सिव अवराधे। लहिअ न कोटि जोग जप साधें।।
दोहा/सोरठा
अस कहि नारद सुमिरि हरि गिरिजहि दीन्हि असीस।
होइहि यह कल्यान अब संसय तजहु गिरीस।।70।।
चौपाई
tadapi ēka maiṃ kahauom upāī. hōi karai jauṃ daiu sahāī..
jasa baru maiṃ baranēuom tumha pāhīṃ. milahi umahi tasa saṃsaya nāhīṃ..
jē jē bara kē dōṣa bakhānē. tē saba siva pahi maiṃ anumānē..
jauṃ bibāhu saṃkara sana hōī. dōṣau guna sama kaha sabu kōī..
jauṃ ahi sēja sayana hari karahīṃ. budha kachu tinha kara dōṣu na dharahīṃ..
bhānu kṛsānu sarba rasa khāhīṃ. tinha kahaom maṃda kahata kōu nāhīṃ..
subha aru asubha salila saba bahaī. surasari kōu apunīta na kahaī..
samaratha kahuom nahiṃ dōṣu gōsāī. rabi pāvaka surasari kī nāī..
चौपाई
surasari jala kṛta bāruni jānā. kabahuom na saṃta karahiṃ tēhi pānā..
surasari milēṃ sō pāvana jaisēṃ. īsa anīsahi aṃtaru taisēṃ..
saṃbhu sahaja samaratha bhagavānā. ēhi bibāhaom saba bidhi kalyānā..
durārādhya pai ahahiṃ mahēsū. āsutōṣa puni kiēom kalēsū..
jauṃ tapu karai kumāri tumhārī. bhāviu mēṭi sakahiṃ tripurārī..
jadyapi bara anēka jaga māhīṃ. ēhi kahaom siva taji dūsara nāhīṃ..
bara dāyaka pranatārati bhaṃjana. kṛpāsiṃdhu sēvaka mana raṃjana..
icchita phala binu siva avarādhē. lahia na kōṭi jōga japa sādhēṃ..
