चौपाई
नगर निकट बरात सुनि आई। पुर खरभरु सोभा अधिकाई।।
करि बनाव सजि बाहन नाना। चले लेन सादर अगवाना।।
हियँ हरषे सुर सेन निहारी। हरिहि देखि अति भए सुखारी।।
सिव समाज जब देखन लागे। बिडरि चले बाहन सब भागे।।
धरि धीरजु तहँ रहे सयाने। बालक सब लै जीव पराने।।
गएँ भवन पूछहिं पितु माता। कहहिं बचन भय कंपित गाता।।
कहिअ काह कहि जाइ न बाता। जम कर धार किधौं बरिआता।।
बरु बौराह बसहँ असवारा। ब्याल कपाल बिभूषन छारा।।
चौपाई
लै अगवान बरातहि आए। दिए सबहि जनवास सुहाए।।
मैनाँ सुभ आरती सँवारी। संग सुमंगल गावहिं नारी।।
कंचन थार सोह बर पानी। परिछन चली हरहि हरषानी।।
बिकट बेष रुद्रहि जब देखा। अबलन्ह उर भय भयउ बिसेषा।।
भागि भवन पैठीं अति त्रासा। गए महेसु जहाँ जनवासा।।
मैना हृदयँ भयउ दुखु भारी। लीन्ही बोलि गिरीसकुमारी।।
अधिक सनेहँ गोद बैठारी। स्याम सरोज नयन भरे बारी।।
जेहिं बिधि तुम्हहि रूपु अस दीन्हा। तेहिं जड़ बरु बाउर कस कीन्हा।।
छंद
कस कीन्ह बरु बौराह बिधि जेहिं तुम्हहि सुंदरता दई।
जो फलु चहिअ सुरतरुहिं सो बरबस बबूरहिं लागई।।
तुम्ह सहित गिरि तें गिरौं पावक जरौं जलनिधि महुँ परौं।।
घरु जाउ अपजसु होउ जग जीवत बिबाहु न हौं करौं।।
दोहा/सोरठा
भई बिकल अबला सकल दुखित देखि गिरिनारि।
करि बिलापु रोदति बदति सुता सनेहु सँभारि।।96।।
चौपाई
nagara nikaṭa barāta suni āī. pura kharabharu sōbhā adhikāī..
kari banāva saji bāhana nānā. calē lēna sādara agavānā..
hiyaom haraṣē sura sēna nihārī. harihi dēkhi ati bhaē sukhārī..
siva samāja jaba dēkhana lāgē. biḍari calē bāhana saba bhāgē..
dhari dhīraju tahaom rahē sayānē. bālaka saba lai jīva parānē..
gaēom bhavana pūchahiṃ pitu mātā. kahahiṃ bacana bhaya kaṃpita gātā..
kahia kāha kahi jāi na bātā. jama kara dhāra kidhauṃ bariātā..
baru baurāha basahaom asavārā. byāla kapāla bibhūṣana chārā..
चौपाई
lai agavāna barātahi āē. diē sabahi janavāsa suhāē..
maināom subha āratī saomvārī. saṃga sumaṃgala gāvahiṃ nārī..
kaṃcana thāra sōha bara pānī. parichana calī harahi haraṣānī..
bikaṭa bēṣa rudrahi jaba dēkhā. abalanha ura bhaya bhayau bisēṣā..
bhāgi bhavana paiṭhīṃ ati trāsā. gaē mahēsu jahāom janavāsā..
mainā hṛdayaom bhayau dukhu bhārī. līnhī bōli girīsakumārī..
adhika sanēhaom gōda baiṭhārī. syāma sarōja nayana bharē bārī..
jēhiṃ bidhi tumhahi rūpu asa dīnhā. tēhiṃ jaḍa baru bāura kasa kīnhā..
छंद
kasa kīnha baru baurāha bidhi jēhiṃ tumhahi suṃdaratā daī.
jō phalu cahia surataruhiṃ sō barabasa babūrahiṃ lāgaī..
tumha sahita giri tēṃ girauṃ pāvaka jarauṃ jalanidhi mahuom parauṃ..
gharu jāu apajasu hōu jaga jīvata bibāhu na hauṃ karauṃ..
दोहा/सोरठा
bhaī bikala abalā sakala dukhita dēkhi girināri.
kari bilāpu rōdati badati sutā sanēhu saombhāri..96..
