चौपाई
सायक एक नाभि सर सोषा। अपर लगे भुज सिर करि रोषा।।
लै सिर बाहु चले नाराचा। सिर भुज हीन रुंड महि नाचा।।
धरनि धसइ धर धाव प्रचंडा। तब सर हति प्रभु कृत दुइ खंडा।।
गर्जेउ मरत घोर रव भारी। कहाँ रामु रन हतौं पचारी।।
डोली भूमि गिरत दसकंधर। छुभित सिंधु सरि दिग्गज भूधर।।
धरनि परेउ द्वौ खंड बढ़ाई। चापि भालु मर्कट समुदाई।।
मंदोदरि आगें भुज सीसा। धरि सर चले जहाँ जगदीसा।।
प्रबिसे सब निषंग महु जाई। देखि सुरन्ह दुंदुभीं बजाई।।
तासु तेज समान प्रभु आनन। हरषे देखि संभु चतुरानन।।
जय जय धुनि पूरी ब्रह्मंडा। जय रघुबीर प्रबल भुजदंडा।।
बरषहि सुमन देव मुनि बृंदा। जय कृपाल जय जयति मुकुंदा।।
चौपाई
पति सिर देखत मंदोदरी। मुरुछित बिकल धरनि खसि परी।।
जुबति बृंद रोवत उठि धाईं। तेहि उठाइ रावन पहिं आई।।
पति गति देखि ते करहिं पुकारा। छूटे कच नहिं बपुष सँभारा।।
उर ताड़ना करहिं बिधि नाना। रोवत करहिं प्रताप बखाना।।
तव बल नाथ डोल नित धरनी। तेज हीन पावक ससि तरनी।।
सेष कमठ सहि सकहिं न भारा। सो तनु भूमि परेउ भरि छारा।।
बरुन कुबेर सुरेस समीरा। रन सन्मुख धरि काहुँ न धीरा।।
भुजबल जितेहु काल जम साईं। आजु परेहु अनाथ की नाईं।।
जगत बिदित तुम्हारी प्रभुताई। सुत परिजन बल बरनि न जाई।।
राम बिमुख अस हाल तुम्हारा। रहा न कोउ कुल रोवनिहारा।।
तव बस बिधि प्रपंच सब नाथा। सभय दिसिप नित नावहिं माथा।।
अब तव सिर भुज जंबुक खाहीं। राम बिमुख यह अनुचित नाहीं।।
काल बिबस पति कहा न माना। अग जग नाथु मनुज करि जाना।।
चौपाई
sāyaka ēka nābhi sara sōṣā. apara lagē bhuja sira kari rōṣā..
lai sira bāhu calē nārācā. sira bhuja hīna ruṃḍa mahi nācā..
dharani dhasai dhara dhāva pracaṃḍā. taba sara hati prabhu kṛta dui khaṃḍā..
garjēu marata ghōra rava bhārī. kahāom rāmu rana hatauṃ pacārī..
ḍōlī bhūmi girata dasakaṃdhara. chubhita siṃdhu sari diggaja bhūdhara..
dharani parēu dvau khaṃḍa baḍhaāī. cāpi bhālu markaṭa samudāī..
maṃdōdari āgēṃ bhuja sīsā. dhari sara calē jahāom jagadīsā..
prabisē saba niṣaṃga mahu jāī. dēkhi suranha duṃdubhīṃ bajāī..
tāsu tēja samāna prabhu ānana. haraṣē dēkhi saṃbhu caturānana..
jaya jaya dhuni pūrī brahmaṃḍā. jaya raghubīra prabala bhujadaṃḍā..
baraṣahi sumana dēva muni bṛṃdā. jaya kṛpāla jaya jayati mukuṃdā..
चौपाई
pati sira dēkhata maṃdōdarī. muruchita bikala dharani khasi parī..
jubati bṛṃda rōvata uṭhi dhāīṃ. tēhi uṭhāi rāvana pahiṃ āī..
pati gati dēkhi tē karahiṃ pukārā. chūṭē kaca nahiṃ bapuṣa saombhārā..
ura tāḍanā karahiṃ bidhi nānā. rōvata karahiṃ pratāpa bakhānā..
tava bala nātha ḍōla nita dharanī. tēja hīna pāvaka sasi taranī..
sēṣa kamaṭha sahi sakahiṃ na bhārā. sō tanu bhūmi parēu bhari chārā..
baruna kubēra surēsa samīrā. rana sanmukha dhari kāhuom na dhīrā..
bhujabala jitēhu kāla jama sāīṃ. āju parēhu anātha kī nāīṃ..
jagata bidita tumhārī prabhutāī. suta parijana bala barani na jāī..
rāma bimukha asa hāla tumhārā. rahā na kōu kula rōvanihārā..
tava basa bidhi prapaṃca saba nāthā. sabhaya disipa nita nāvahiṃ māthā..
aba tava sira bhuja jaṃbuka khāhīṃ. rāma bimukha yaha anucita nāhīṃ..
kāla bibasa pati kahā na mānā. aga jaga nāthu manuja kari jānā..
