चौपाई
सुनत सुधासम बचन राम के। गहे सबनि पद कृपाधाम के।।
जननि जनक गुर बंधु हमारे। कृपा निधान प्रान ते प्यारे।।
तनु धनु धाम राम हितकारी। सब बिधि तुम्ह प्रनतारति हारी।।
असि सिख तुम्ह बिनु देइ न कोऊ। मातु पिता स्वारथ रत ओऊ।।
हेतु रहित जग जुग उपकारी। तुम्ह तुम्हार सेवक असुरारी।।
स्वारथ मीत सकल जग माहीं। सपनेहुँ प्रभु परमारथ नाहीं।।
सबके बचन प्रेम रस साने। सुनि रघुनाथ हृदयँ हरषाने।।
निज निज गृह गए आयसु पाई। बरनत प्रभु बतकही सुहाई।।
चौपाई
एक बार बसिष्ट मुनि आए। जहाँ राम सुखधाम सुहाए।।
अति आदर रघुनायक कीन्हा। पद पखारि पादोदक लीन्हा।।
राम सुनहु मुनि कह कर जोरी। कृपासिंधु बिनती कछु मोरी।।
देखि देखि आचरन तुम्हारा। होत मोह मम हृदयँ अपारा।।
महिमा अमित बेद नहिं जाना। मैं केहि भाँति कहउँ भगवाना।।
उपरोहित्य कर्म अति मंदा। बेद पुरान सुमृति कर निंदा।।
जब न लेउँ मैं तब बिधि मोही। कहा लाभ आगें सुत तोही।।
परमातमा ब्रह्म नर रूपा। होइहि रघुकुल भूषन भूपा।।
चौपाई
sunata sudhāsama bacana rāma kē. gahē sabani pada kṛpādhāma kē..
janani janaka gura baṃdhu hamārē. kṛpā nidhāna prāna tē pyārē..
tanu dhanu dhāma rāma hitakārī. saba bidhi tumha pranatārati hārī..
asi sikha tumha binu dēi na kōū. mātu pitā svāratha rata ōū..
hētu rahita jaga juga upakārī. tumha tumhāra sēvaka asurārī..
svāratha mīta sakala jaga māhīṃ. sapanēhuom prabhu paramāratha nāhīṃ..
sabakē bacana prēma rasa sānē. suni raghunātha hṛdayaom haraṣānē..
nija nija gṛha gaē āyasu pāī. baranata prabhu batakahī suhāī..
चौपाई
ēka bāra basiṣṭa muni āē. jahāom rāma sukhadhāma suhāē..
ati ādara raghunāyaka kīnhā. pada pakhāri pādōdaka līnhā..
rāma sunahu muni kaha kara jōrī. kṛpāsiṃdhu binatī kachu mōrī..
dēkhi dēkhi ācarana tumhārā. hōta mōha mama hṛdayaom apārā..
mahimā amita bēda nahiṃ jānā. maiṃ kēhi bhāomti kahauom bhagavānā..
uparōhitya karma ati maṃdā. bēda purāna sumṛti kara niṃdā..
jaba na lēuom maiṃ taba bidhi mōhī. kahā lābha āgēṃ suta tōhī..
paramātamā brahma nara rūpā. hōihi raghukula bhūṣana bhūpā..
