चौपाई
प्रभु बिलोकि सर सकहिं न डारी। थकित भई रजनीचर धारी।।
सचिव बोलि बोले खर दूषन। यह कोउ नृपबालक नर भूषन।।
नाग असुर सुर नर मुनि जेते। देखे जिते हते हम केते।।
हम भरि जन्म सुनहु सब भाई। देखी नहिं असि सुंदरताई।।
जद्यपि भगिनी कीन्ह कुरूपा। बध लायक नहिं पुरुष अनूपा।।
देहु तुरत निज नारि दुराई। जीअत भवन जाहु द्वौ भाई।।
मोर कहा तुम्ह ताहि सुनावहु। तासु बचन सुनि आतुर आवहु।।
दूतन्ह कहा राम सन जाई। सुनत राम बोले मुसकाई।।
हम छत्री मृगया बन करहीं। तुम्ह से खल मृग खौजत फिरहीं।।
रिपु बलवंत देखि नहिं डरहीं। एक बार कालहु सन लरहीं।।
जद्यपि मनुज दनुज कुल घालक। मुनि पालक खल सालक बालक।।
जौं न होइ बल घर फिरि जाहू। समर बिमुख मैं हतउँ न काहू।।
रन चढ़ि करिअ कपट चतुराई। रिपु पर कृपा परम कदराई।।
दूतन्ह जाइ तुरत सब कहेऊ। सुनि खर दूषन उर अति दहेऊ।।
छंद
तब चले जान बबान कराल। फुंकरत जनु बहु ब्याल।।
कोपेउ समर श्रीराम। चले बिसिख निसित निकाम।।
अवलोकि खरतर तीर। मुरि चले निसिचर बीर।।
भए क्रुद्ध तीनिउ भाइ। जो भागि रन ते जाइ।।
तेहि बधब हम निज पानि। फिरे मरन मन महुँ ठानि।।
आयुध अनेक प्रकार। सनमुख ते करहिं प्रहार।।
रिपु परम कोपे जानि। प्रभु धनुष सर संधानि।।
छाँड़े बिपुल नाराच। लगे कटन बिकट पिसाच।।
उर सीस भुज कर चरन। जहँ तहँ लगे महि परन।।
चिक्करत लागत बान। धर परत कुधर समान।।
भट कटत तन सत खंड। पुनि उठत करि पाषंड।।
नभ उड़त बहु भुज मुंड। बिनु मौलि धावत रुंड।।
खग कंक काक सृगाल। कटकटहिं कठिन कराल।।
कटकटहिं ज़ंबुक भूत प्रेत पिसाच खर्पर संचहीं।
बेताल बीर कपाल ताल बजाइ जोगिनि नंचहीं।।
रघुबीर बान प्रचंड खंडहिं भटन्ह के उर भुज सिरा।
जहँ तहँ परहिं उठि लरहिं धर धरु धरु करहिं भयकर गिरा।।
अंतावरीं गहि उड़त गीध पिसाच कर गहि धावहीं।।
संग्राम पुर बासी मनहुँ बहु बाल गुड़ी उड़ावहीं।।
मारे पछारे उर बिदारे बिपुल भट कहँरत परे।
अवलोकि निज दल बिकल भट तिसिरादि खर दूषन फिरे।।
सर सक्ति तोमर परसु सूल कृपान एकहि बारहीं।
करि कोप श्रीरघुबीर पर अगनित निसाचर डारहीं।।
प्रभु निमिष महुँ रिपु सर निवारि पचारि डारे सायका।
दस दस बिसिख उर माझ मारे सकल निसिचर नायका।।
महि परत उठि भट भिरत मरत न करत माया अति घनी।
सुर डरत चौदह सहस प्रेत बिलोकि एक अवध धनी।।
सुर मुनि सभय प्रभु देखि मायानाथ अति कौतुक कर् यो।
देखहि परसपर राम करि संग्राम रिपुदल लरि मर् यो।।
चौपाई
prabhu bilōki sara sakahiṃ na ḍārī. thakita bhaī rajanīcara dhārī..
saciva bōli bōlē khara dūṣana. yaha kōu nṛpabālaka nara bhūṣana..
nāga asura sura nara muni jētē. dēkhē jitē hatē hama kētē..
hama bhari janma sunahu saba bhāī. dēkhī nahiṃ asi suṃdaratāī..
jadyapi bhaginī kīnha kurūpā. badha lāyaka nahiṃ puruṣa anūpā..
dēhu turata nija nāri durāī. jīata bhavana jāhu dvau bhāī..
mōra kahā tumha tāhi sunāvahu. tāsu bacana suni ātura āvahu..
dūtanha kahā rāma sana jāī. sunata rāma bōlē musakāī..
hama chatrī mṛgayā bana karahīṃ. tumha sē khala mṛga khaujata phirahīṃ..
ripu balavaṃta dēkhi nahiṃ ḍarahīṃ. ēka bāra kālahu sana larahīṃ..
jadyapi manuja danuja kula ghālaka. muni pālaka khala sālaka bālaka..
jauṃ na hōi bala ghara phiri jāhū. samara bimukha maiṃ hatauom na kāhū..
rana caḍhai karia kapaṭa caturāī. ripu para kṛpā parama kadarāī..
dūtanha jāi turata saba kahēū. suni khara dūṣana ura ati dahēū..
छंद
taba calē jāna babāna karāla. phuṃkarata janu bahu byāla..
kōpēu samara śrīrāma. calē bisikha nisita nikāma..
avalōki kharatara tīra. muri calē nisicara bīra..
bhaē kruddha tīniu bhāi. jō bhāgi rana tē jāi..
tēhi badhaba hama nija pāni. phirē marana mana mahuom ṭhāni..
āyudha anēka prakāra. sanamukha tē karahiṃ prahāra..
ripu parama kōpē jāni. prabhu dhanuṣa sara saṃdhāni..
chāomḍaē bipula nārāca. lagē kaṭana bikaṭa pisāca..
ura sīsa bhuja kara carana. jahaom tahaom lagē mahi parana..
cikkarata lāgata bāna. dhara parata kudhara samāna..
bhaṭa kaṭata tana sata khaṃḍa. puni uṭhata kari pāṣaṃḍa..
nabha uḍata bahu bhuja muṃḍa. binu mauli dhāvata ruṃḍa..
khaga kaṃka kāka sṛgāla. kaṭakaṭahiṃ kaṭhina karāla..
kaṭakaṭahiṃ jaṃbuka bhūta prēta pisāca kharpara saṃcahīṃ.
bētāla bīra kapāla tāla bajāi jōgini naṃcahīṃ..
raghubīra bāna pracaṃḍa khaṃḍahiṃ bhaṭanha kē ura bhuja sirā.
jahaom tahaom parahiṃ uṭhi larahiṃ dhara dharu dharu karahiṃ bhayakara girā..
aṃtāvarīṃ gahi uḍata gīdha pisāca kara gahi dhāvahīṃ..
saṃgrāma pura bāsī manahuom bahu bāla guḍaī uḍaāvahīṃ..
mārē pachārē ura bidārē bipula bhaṭa kahaomrata parē.
avalōki nija dala bikala bhaṭa tisirādi khara dūṣana phirē..
sara sakti tōmara parasu sūla kṛpāna ēkahi bārahīṃ.
kari kōpa śrīraghubīra para aganita nisācara ḍārahīṃ..
prabhu nimiṣa mahuom ripu sara nivāri pacāri ḍārē sāyakā.
dasa dasa bisikha ura mājha mārē sakala nisicara nāyakā..
mahi parata uṭhi bhaṭa bhirata marata na karata māyā ati ghanī.
sura ḍarata caudaha sahasa prēta bilōki ēka avadha dhanī..
sura muni sabhaya prabhu dēkhi māyānātha ati kautuka kar yō.
dēkhahi parasapara rāma kari saṃgrāma ripudala lari mar yō..
