चौपाई
ईस प्रसाद असीस तुम्हारी। सुत सुतबधू देवसरि बारी।।
राम सपथ मैं कीन्ह न काऊ। सो करि कहउँ सखी सति भाऊ।।
भरत सील गुन बिनय बड़ाई। भायप भगति भरोस भलाई।।
कहत सारदहु कर मति हीचे। सागर सीप कि जाहिं उलीचे।।
जानउँ सदा भरत कुलदीपा। बार बार मोहि कहेउ महीपा।।
कसें कनकु मनि पारिखि पाएँ। पुरुष परिखिअहिं समयँ सुभाएँ।
अनुचित आजु कहब अस मोरा। सोक सनेहँ सयानप थोरा।।
सुनि सुरसरि सम पावनि बानी। भईं सनेह बिकल सब रानी।।
दोहा/सोरठा
कौसल्या कह धीर धरि सुनहु देबि मिथिलेसि।
को बिबेकनिधि बल्लभहि तुम्हहि सकइ उपदेसि।।283।।
चौपाई
रानि राय सन अवसरु पाई। अपनी भाँति कहब समुझाई।।
रखिअहिं लखनु भरतु गबनहिं बन। जौं यह मत मानै महीप मन।।
तौ भल जतनु करब सुबिचारी। मोरें सौचु भरत कर भारी।।
गूढ़ सनेह भरत मन माही। रहें नीक मोहि लागत नाहीं।।
लखि सुभाउ सुनि सरल सुबानी। सब भइ मगन करुन रस रानी।।
नभ प्रसून झरि धन्य धन्य धुनि। सिथिल सनेहँ सिद्ध जोगी मुनि।।
सबु रनिवासु बिथकि लखि रहेऊ। तब धरि धीर सुमित्राँ कहेऊ।।
देबि दंड जुग जामिनि बीती। राम मातु सुनी उठी सप्रीती।।
दोहा/सोरठा
बेगि पाउ धारिअ थलहि कह सनेहँ सतिभाय।
हमरें तौ अब ईस गति के मिथिलेस सहाय।।284।।
चौपाई
īsa prasāda asīsa tumhārī. suta sutabadhū dēvasari bārī..
rāma sapatha maiṃ kīnha na kāū. sō kari kahauom sakhī sati bhāū..
bharata sīla guna binaya baḍaāī. bhāyapa bhagati bharōsa bhalāī..
kahata sāradahu kara mati hīcē. sāgara sīpa ki jāhiṃ ulīcē..
jānauom sadā bharata kuladīpā. bāra bāra mōhi kahēu mahīpā..
kasēṃ kanaku mani pārikhi pāēom. puruṣa parikhiahiṃ samayaom subhāēom.
anucita āju kahaba asa mōrā. sōka sanēhaom sayānapa thōrā..
suni surasari sama pāvani bānī. bhaīṃ sanēha bikala saba rānī..
चौपाई
rāni rāya sana avasaru pāī. apanī bhāomti kahaba samujhāī..
rakhiahiṃ lakhanu bharatu gabanahiṃ bana. jauṃ yaha mata mānai mahīpa mana..
tau bhala jatanu karaba subicārī. mōrēṃ saucu bharata kara bhārī..
gūḍha sanēha bharata mana māhī. rahēṃ nīka mōhi lāgata nāhīṃ..
lakhi subhāu suni sarala subānī. saba bhai magana karuna rasa rānī..
nabha prasūna jhari dhanya dhanya dhuni. sithila sanēhaom siddha jōgī muni..
sabu ranivāsu bithaki lakhi rahēū. taba dhari dhīra sumitrāom kahēū..
dēbi daṃḍa juga jāmini bītī. rāma mātu sunī uṭhī saprītī..
