चौपाई
एक बिधातहिं दूषनु देंहीं। सुधा देखाइ दीन्ह बिषु जेहीं।।
खरभरु नगर सोचु सब काहू। दुसह दाहु उर मिटा उछाहू।।
बिप्रबधू कुलमान्य जठेरी। जे प्रिय परम कैकेई केरी।।
लगीं देन सिख सीलु सराही। बचन बानसम लागहिं ताही।।
भरतु न मोहि प्रिय राम समाना। सदा कहहु यहु सबु जगु जाना।।
करहु राम पर सहज सनेहू। केहिं अपराध आजु बनु देहू।।
कबहुँ न कियहु सवति आरेसू। प्रीति प्रतीति जान सबु देसू।।
कौसल्याँ अब काह बिगारा। तुम्ह जेहि लागि बज्र पुर पारा।।
दोहा/सोरठा
सीय कि पिय सँगु परिहरिहि लखनु कि रहिहहिं धाम।
राजु कि भूँजब भरत पुर नृपु कि जिइहि बिनु राम।।49।।
चौपाई
अस बिचारि उर छाड़हु कोहू। सोक कलंक कोठि जनि होहू।।
भरतहि अवसि देहु जुबराजू। कानन काह राम कर काजू।।
नाहिन रामु राज के भूखे। धरम धुरीन बिषय रस रूखे।।
गुर गृह बसहुँ रामु तजि गेहू। नृप सन अस बरु दूसर लेहू।।
जौं नहिं लगिहहु कहें हमारे। नहिं लागिहि कछु हाथ तुम्हारे।।
जौं परिहास कीन्हि कछु होई। तौ कहि प्रगट जनावहु सोई।।
राम सरिस सुत कानन जोगू। काह कहिहि सुनि तुम्ह कहुँ लोगू।।
उठहु बेगि सोइ करहु उपाई। जेहि बिधि सोकु कलंकु नसाई।।
चौपाई
ēka bidhātahiṃ dūṣanu dēṃhīṃ. sudhā dēkhāi dīnha biṣu jēhīṃ..
kharabharu nagara sōcu saba kāhū. dusaha dāhu ura miṭā uchāhū..
biprabadhū kulamānya jaṭhērī. jē priya parama kaikēī kērī..
lagīṃ dēna sikha sīlu sarāhī. bacana bānasama lāgahiṃ tāhī..
bharatu na mōhi priya rāma samānā. sadā kahahu yahu sabu jagu jānā..
karahu rāma para sahaja sanēhū. kēhiṃ aparādha āju banu dēhū..
kabahuom na kiyahu savati ārēsū. prīti pratīti jāna sabu dēsū..
kausalyāom aba kāha bigārā. tumha jēhi lāgi bajra pura pārā..
चौपाई
asa bicāri ura chāḍahu kōhū. sōka kalaṃka kōṭhi jani hōhū..
bharatahi avasi dēhu jubarājū. kānana kāha rāma kara kājū..
nāhina rāmu rāja kē bhūkhē. dharama dhurīna biṣaya rasa rūkhē..
gura gṛha basahuom rāmu taji gēhū. nṛpa sana asa baru dūsara lēhū..
jauṃ nahiṃ lagihahu kahēṃ hamārē. nahiṃ lāgihi kachu hātha tumhārē..
jauṃ parihāsa kīnhi kachu hōī. tau kahi pragaṭa janāvahu sōī..
rāma sarisa suta kānana jōgū. kāha kahihi suni tumha kahuom lōgū..
uṭhahu bēgi sōi karahu upāī. jēhi bidhi sōku kalaṃku nasāī..
