चौपाई
मातु पिता भगिनी प्रिय भाई। प्रिय परिवारु सुह्रद समुदाई।।
सासु ससुर गुर सजन सहाई। सुत सुंदर सुसील सुखदाई।।
जहँ लगि नाथ नेह अरु नाते। पिय बिनु तियहि तरनिहु ते ताते।।
तनु धनु धामु धरनि पुर राजू। पति बिहीन सबु सोक समाजू।।
भोग रोगसम भूषन भारू। जम जातना सरिस संसारू।।
प्राननाथ तुम्ह बिनु जग माहीं। मो कहुँ सुखद कतहुँ कछु नाहीं।।
जिय बिनु देह नदी बिनु बारी। तैसिअ नाथ पुरुष बिनु नारी।।
नाथ सकल सुख साथ तुम्हारें। सरद बिमल बिधु बदनु निहारें।।
दोहा/सोरठा
खग मृग परिजन नगरु बनु बलकल बिमल दुकूल।
नाथ साथ सुरसदन सम परनसाल सुख मूल।।65।।
चौपाई
बनदेवीं बनदेव उदारा। करिहहिं सासु ससुर सम सारा।।
कुस किसलय साथरी सुहाई। प्रभु सँग मंजु मनोज तुराई।।
कंद मूल फल अमिअ अहारू। अवध सौध सत सरिस पहारू।।
छिनु छिनु प्रभु पद कमल बिलोकि। रहिहउँ मुदित दिवस जिमि कोकी।।
बन दुख नाथ कहे बहुतेरे। भय बिषाद परिताप घनेरे।।
प्रभु बियोग लवलेस समाना। सब मिलि होहिं न कृपानिधाना।।
अस जियँ जानि सुजान सिरोमनि। लेइअ संग मोहि छाड़िअ जनि।।
बिनती बहुत करौं का स्वामी। करुनामय उर अंतरजामी।।
दोहा/सोरठा
राखिअ अवध जो अवधि लगि रहत न जनिअहिं प्रान।
दीनबंधु संदर सुखद सील सनेह निधान।।66।।
चौपाई
mātu pitā bhaginī priya bhāī. priya parivāru suhrada samudāī..
sāsu sasura gura sajana sahāī. suta suṃdara susīla sukhadāī..
jahaom lagi nātha nēha aru nātē. piya binu tiyahi taranihu tē tātē..
tanu dhanu dhāmu dharani pura rājū. pati bihīna sabu sōka samājū..
bhōga rōgasama bhūṣana bhārū. jama jātanā sarisa saṃsārū..
prānanātha tumha binu jaga māhīṃ. mō kahuom sukhada katahuom kachu nāhīṃ..
jiya binu dēha nadī binu bārī. taisia nātha puruṣa binu nārī..
nātha sakala sukha sātha tumhārēṃ. sarada bimala bidhu badanu nihārēṃ..
चौपाई
banadēvīṃ banadēva udārā. karihahiṃ sāsu sasura sama sārā..
kusa kisalaya sātharī suhāī. prabhu saomga maṃju manōja turāī..
kaṃda mūla phala amia ahārū. avadha saudha sata sarisa pahārū..
chinu chinu prabhu pada kamala bilōki. rahihauom mudita divasa jimi kōkī..
bana dukha nātha kahē bahutērē. bhaya biṣāda paritāpa ghanērē..
prabhu biyōga lavalēsa samānā. saba mili hōhiṃ na kṛpānidhānā..
asa jiyaom jāni sujāna sirōmani. lēia saṃga mōhi chāḍaia jani..
binatī bahuta karauṃ kā svāmī. karunāmaya ura aṃtarajāmī..
