चौपाई
कृपासिंधु बोले मुसुकाई। सोइ करु जेंहि तव नाव न जाई।।
वेगि आनु जल पाय पखारू। होत बिलंबु उतारहि पारू।।
जासु नाम सुमरत एक बारा। उतरहिं नर भवसिंधु अपारा।।
सोइ कृपालु केवटहि निहोरा। जेहिं जगु किय तिहु पगहु ते थोरा।।
पद नख निरखि देवसरि हरषी। सुनि प्रभु बचन मोहँ मति करषी।।
केवट राम रजायसु पावा। पानि कठवता भरि लेइ आवा।।
अति आनंद उमगि अनुरागा। चरन सरोज पखारन लागा।।
बरषि सुमन सुर सकल सिहाहीं। एहि सम पुन्यपुंज कोउ नाहीं।।
दोहा/सोरठा
पद पखारि जलु पान करि आपु सहित परिवार।
पितर पारु करि प्रभुहि पुनि मुदित गयउ लेइ पार।।101।।
चौपाई
उतरि ठाड़ भए सुरसरि रेता। सीयराम गुह लखन समेता।।
केवट उतरि दंडवत कीन्हा। प्रभुहि सकुच एहि नहिं कछु दीन्हा।।
पिय हिय की सिय जाननिहारी। मनि मुदरी मन मुदित उतारी।।
कहेउ कृपाल लेहि उतराई। केवट चरन गहे अकुलाई।।
नाथ आजु मैं काह न पावा। मिटे दोष दुख दारिद दावा।।
बहुत काल मैं कीन्हि मजूरी। आजु दीन्ह बिधि बनि भलि भूरी।।
अब कछु नाथ न चाहिअ मोरें। दीनदयाल अनुग्रह तोरें।।
फिरती बार मोहि जे देबा। सो प्रसादु मैं सिर धरि लेबा।।
दोहा/सोरठा
बहुत कीन्ह प्रभु लखन सियँ नहिं कछु केवटु लेइ।
बिदा कीन्ह करुनायतन भगति बिमल बरु देइ।।102।।
चौपाई
kṛpāsiṃdhu bōlē musukāī. sōi karu jēṃhi tava nāva na jāī..
vēgi ānu jala pāya pakhārū. hōta bilaṃbu utārahi pārū..
jāsu nāma sumarata ēka bārā. utarahiṃ nara bhavasiṃdhu apārā..
sōi kṛpālu kēvaṭahi nihōrā. jēhiṃ jagu kiya tihu pagahu tē thōrā..
pada nakha nirakhi dēvasari haraṣī. suni prabhu bacana mōhaom mati karaṣī..
kēvaṭa rāma rajāyasu pāvā. pāni kaṭhavatā bhari lēi āvā..
ati ānaṃda umagi anurāgā. carana sarōja pakhārana lāgā..
baraṣi sumana sura sakala sihāhīṃ. ēhi sama punyapuṃja kōu nāhīṃ..
चौपाई
utari ṭhāḍa bhaē surasari rētā. sīyarāma guha lakhana samētā..
kēvaṭa utari daṃḍavata kīnhā. prabhuhi sakuca ēhi nahiṃ kachu dīnhā..
piya hiya kī siya jānanihārī. mani mudarī mana mudita utārī..
kahēu kṛpāla lēhi utarāī. kēvaṭa carana gahē akulāī..
nātha āju maiṃ kāha na pāvā. miṭē dōṣa dukha dārida dāvā..
bahuta kāla maiṃ kīnhi majūrī. āju dīnha bidhi bani bhali bhūrī..
aba kachu nātha na cāhia mōrēṃ. dīnadayāla anugraha tōrēṃ..
phiratī bāra mōhi jē dēbā. sō prasādu maiṃ sira dhari lēbā..
