चौपाई
प्राननाथ प्रिय देवर साथा। बीर धुरीन धरें धनु भाथा।।
नहिं मग श्रमु भ्रमु दुख मन मोरें। मोहि लगि सोचु करिअ जनि भोरें।।
सुनि सुमंत्रु सिय सीतलि बानी। भयउ बिकल जनु फनि मनि हानी।।
नयन सूझ नहिं सुनइ न काना। कहि न सकइ कछु अति अकुलाना।।
राम प्रबोधु कीन्ह बहु भाँति। तदपि होति नहिं सीतलि छाती।।
जतन अनेक साथ हित कीन्हे। उचित उतर रघुनंदन दीन्हे।।
मेटि जाइ नहिं राम रजाई। कठिन करम गति कछु न बसाई।।
राम लखन सिय पद सिरु नाई। फिरेउ बनिक जिमि मूर गवाँई।।
दोहा/सोरठा
-रथ हाँकेउ हय राम तन हेरि हेरि हिहिनाहिं।
देखि निषाद बिषादबस धुनहिं सीस पछिताहिं।।99।।
चौपाई
जासु बियोग बिकल पसु ऐसे। प्रजा मातु पितु जिइहहिं कैसें।।
बरबस राम सुमंत्रु पठाए। सुरसरि तीर आपु तब आए।।
मागी नाव न केवटु आना। कहइ तुम्हार मरमु मैं जाना।।
चरन कमल रज कहुँ सबु कहई। मानुष करनि मूरि कछु अहई।।
छुअत सिला भइ नारि सुहाई। पाहन तें न काठ कठिनाई।।
तरनिउ मुनि घरिनि होइ जाई। बाट परइ मोरि नाव उड़ाई।।
एहिं प्रतिपालउँ सबु परिवारू। नहिं जानउँ कछु अउर कबारू।।
जौ प्रभु पार अवसि गा चहहू। मोहि पद पदुम पखारन कहहू।।
चौपाई
prānanātha priya dēvara sāthā. bīra dhurīna dharēṃ dhanu bhāthā..
nahiṃ maga śramu bhramu dukha mana mōrēṃ. mōhi lagi sōcu karia jani bhōrēṃ..
suni sumaṃtru siya sītali bānī. bhayau bikala janu phani mani hānī..
nayana sūjha nahiṃ sunai na kānā. kahi na sakai kachu ati akulānā..
rāma prabōdhu kīnha bahu bhāomti. tadapi hōti nahiṃ sītali chātī..
jatana anēka sātha hita kīnhē. ucita utara raghunaṃdana dīnhē..
mēṭi jāi nahiṃ rāma rajāī. kaṭhina karama gati kachu na basāī..
rāma lakhana siya pada siru nāī. phirēu banika jimi mūra gavāomī..
चौपाई
jāsu biyōga bikala pasu aisē. prajā mātu pitu jiihahiṃ kaisēṃ..
barabasa rāma sumaṃtru paṭhāē. surasari tīra āpu taba āē..
māgī nāva na kēvaṭu ānā. kahai tumhāra maramu maiṃ jānā..
carana kamala raja kahuom sabu kahaī. mānuṣa karani mūri kachu ahaī..
chuata silā bhai nāri suhāī. pāhana tēṃ na kāṭha kaṭhināī..
taraniu muni gharini hōi jāī. bāṭa parai mōri nāva uḍaāī..
ēhiṃ pratipālauom sabu parivārū. nahiṃ jānauom kachu aura kabārū..
jau prabhu pāra avasi gā cahahū. mōhi pada paduma pakhārana kahahū..
