चौपाई
फिरत नारि नर अति पछिताहीं। देअहि दोषु देहिं मन माहीं।।
सहित बिषाद परसपर कहहीं। बिधि करतब उलटे सब अहहीं।।
निपट निरंकुस निठुर निसंकू। जेहिं ससि कीन्ह सरुज सकलंकू।।
रूख कलपतरु सागरु खारा। तेहिं पठए बन राजकुमारा।।
जौं पे इन्हहि दीन्ह बनबासू। कीन्ह बादि बिधि भोग बिलासू।।
ए बिचरहिं मग बिनु पदत्राना। रचे बादि बिधि बाहन नाना।।
ए महि परहिं डासि कुस पाता। सुभग सेज कत सृजत बिधाता।।
तरुबर बास इन्हहि बिधि दीन्हा। धवल धाम रचि रचि श्रमु कीन्हा।।
चौपाई
जौं ए कंद मूल फल खाहीं। बादि सुधादि असन जग माहीं।।
एक कहहिं ए सहज सुहाए। आपु प्रगट भए बिधि न बनाए।।
जहँ लगि बेद कही बिधि करनी। श्रवन नयन मन गोचर बरनी।।
देखहु खोजि भुअन दस चारी। कहँ अस पुरुष कहाँ असि नारी।।
इन्हहि देखि बिधि मनु अनुरागा। पटतर जोग बनावै लागा।।
कीन्ह बहुत श्रम ऐक न आए। तेहिं इरिषा बन आनि दुराए।।
एक कहहिं हम बहुत न जानहिं। आपुहि परम धन्य करि मानहिं।।
ते पुनि पुन्यपुंज हम लेखे। जे देखहिं देखिहहिं जिन्ह देखे।।
दोहा/सोरठा
एहि बिधि कहि कहि बचन प्रिय लेहिं नयन भरि नीर।
किमि चलिहहि मारग अगम सुठि सुकुमार सरीर।।120।।
चौपाई
phirata nāri nara ati pachitāhīṃ. dēahi dōṣu dēhiṃ mana māhīṃ..
sahita biṣāda parasapara kahahīṃ. bidhi karataba ulaṭē saba ahahīṃ..
nipaṭa niraṃkusa niṭhura nisaṃkū. jēhiṃ sasi kīnha saruja sakalaṃkū..
rūkha kalapataru sāgaru khārā. tēhiṃ paṭhaē bana rājakumārā..
jauṃ pē inhahi dīnha banabāsū. kīnha bādi bidhi bhōga bilāsū..
ē bicarahiṃ maga binu padatrānā. racē bādi bidhi bāhana nānā..
ē mahi parahiṃ ḍāsi kusa pātā. subhaga sēja kata sṛjata bidhātā..
tarubara bāsa inhahi bidhi dīnhā. dhavala dhāma raci raci śramu kīnhā..
चौपाई
jauṃ ē kaṃda mūla phala khāhīṃ. bādi sudhādi asana jaga māhīṃ..
ēka kahahiṃ ē sahaja suhāē. āpu pragaṭa bhaē bidhi na banāē..
jahaom lagi bēda kahī bidhi karanī. śravana nayana mana gōcara baranī..
dēkhahu khōji bhuana dasa cārī. kahaom asa puruṣa kahāom asi nārī..
inhahi dēkhi bidhi manu anurāgā. paṭatara jōga banāvai lāgā..
kīnha bahuta śrama aika na āē. tēhiṃ iriṣā bana āni durāē..
ēka kahahiṃ hama bahuta na jānahiṃ. āpuhi parama dhanya kari mānahiṃ..
tē puni punyapuṃja hama lēkhē. jē dēkhahiṃ dēkhihahiṃ jinha dēkhē..
