चौपाई
सीय लखन जेहि बिधि सुखु लहहीं। सोइ रघुनाथ करहि सोइ कहहीं।।
कहहिं पुरातन कथा कहानी। सुनहिं लखनु सिय अति सुखु मानी।
जब जब रामु अवध सुधि करहीं। तब तब बारि बिलोचन भरहीं।।
सुमिरि मातु पितु परिजन भाई। भरत सनेहु सीलु सेवकाई।।
कृपासिंधु प्रभु होहिं दुखारी। धीरजु धरहिं कुसमउ बिचारी।।
लखि सिय लखनु बिकल होइ जाहीं। जिमि पुरुषहि अनुसर परिछाहीं।।
प्रिया बंधु गति लखि रघुनंदनु। धीर कृपाल भगत उर चंदनु।।
लगे कहन कछु कथा पुनीता। सुनि सुखु लहहिं लखनु अरु सीता।।
दोहा/सोरठा
रामु लखन सीता सहित सोहत परन निकेत।
जिमि बासव बस अमरपुर सची जयंत समेत।।141।।
चौपाई
जोगवहिं प्रभु सिय लखनहिं कैसें। पलक बिलोचन गोलक जैसें।।
सेवहिं लखनु सीय रघुबीरहि। जिमि अबिबेकी पुरुष सरीरहि।।
एहि बिधि प्रभु बन बसहिं सुखारी। खग मृग सुर तापस हितकारी।।
कहेउँ राम बन गवनु सुहावा। सुनहु सुमंत्र अवध जिमि आवा।।
फिरेउ निषादु प्रभुहि पहुँचाई। सचिव सहित रथ देखेसि आई।।
मंत्री बिकल बिलोकि निषादू। कहि न जाइ जस भयउ बिषादू।।
राम राम सिय लखन पुकारी। परेउ धरनितल ब्याकुल भारी।।
देखि दखिन दिसि हय हिहिनाहीं। जनु बिनु पंख बिहग अकुलाहीं।।
दोहा/सोरठा
नहिं तृन चरहिं पिअहिं जलु मोचहिं लोचन बारि।
ब्याकुल भए निषाद सब रघुबर बाजि निहारि।।142।।
चौपाई
sīya lakhana jēhi bidhi sukhu lahahīṃ. sōi raghunātha karahi sōi kahahīṃ..
kahahiṃ purātana kathā kahānī. sunahiṃ lakhanu siya ati sukhu mānī.
jaba jaba rāmu avadha sudhi karahīṃ. taba taba bāri bilōcana bharahīṃ..
sumiri mātu pitu parijana bhāī. bharata sanēhu sīlu sēvakāī..
kṛpāsiṃdhu prabhu hōhiṃ dukhārī. dhīraju dharahiṃ kusamau bicārī..
lakhi siya lakhanu bikala hōi jāhīṃ. jimi puruṣahi anusara parichāhīṃ..
priyā baṃdhu gati lakhi raghunaṃdanu. dhīra kṛpāla bhagata ura caṃdanu..
lagē kahana kachu kathā punītā. suni sukhu lahahiṃ lakhanu aru sītā..
चौपाई
jōgavahiṃ prabhu siya lakhanahiṃ kaisēṃ. palaka bilōcana gōlaka jaisēṃ..
sēvahiṃ lakhanu sīya raghubīrahi. jimi abibēkī puruṣa sarīrahi..
ēhi bidhi prabhu bana basahiṃ sukhārī. khaga mṛga sura tāpasa hitakārī..
kahēuom rāma bana gavanu suhāvā. sunahu sumaṃtra avadha jimi āvā..
phirēu niṣādu prabhuhi pahuomcāī. saciva sahita ratha dēkhēsi āī..
maṃtrī bikala bilōki niṣādū. kahi na jāi jasa bhayau biṣādū..
rāma rāma siya lakhana pukārī. parēu dharanitala byākula bhārī..
dēkhi dakhina disi haya hihināhīṃ. janu binu paṃkha bihaga akulāhīṃ..
