चौपाई
बिकल बिलोकि सुतहि समुझावति। मनहुँ जरे पर लोनु लगावति।।
तात राउ नहिं सोचे जोगू। बिढ़इ सुकृत जसु कीन्हेउ भोगू।।
जीवत सकल जनम फल पाए। अंत अमरपति सदन सिधाए।।
अस अनुमानि सोच परिहरहू। सहित समाज राज पुर करहू।।
सुनि सुठि सहमेउ राजकुमारू। पाकें छत जनु लाग अँगारू।।
धीरज धरि भरि लेहिं उसासा। पापनि सबहि भाँति कुल नासा।।
जौं पै कुरुचि रही अति तोही। जनमत काहे न मारे मोही।।
पेड़ काटि तैं पालउ सींचा। मीन जिअन निति बारि उलीचा।।
दोहा/सोरठा
हंसबंसु दसरथु जनकु राम लखन से भाइ।
जननी तूँ जननी भई बिधि सन कछु न बसाइ।।161।।
चौपाई
जब तैं कुमति कुमत जियँ ठयऊ। खंड खंड होइ ह्रदउ न गयऊ।।
बर मागत मन भइ नहिं पीरा। गरि न जीह मुहँ परेउ न कीरा।।
भूपँ प्रतीत तोरि किमि कीन्ही। मरन काल बिधि मति हरि लीन्ही।।
बिधिहुँ न नारि हृदय गति जानी। सकल कपट अघ अवगुन खानी।।
सरल सुसील धरम रत राऊ। सो किमि जानै तीय सुभाऊ।।
अस को जीव जंतु जग माहीं। जेहि रघुनाथ प्रानप्रिय नाहीं।।
भे अति अहित रामु तेउ तोही। को तू अहसि सत्य कहु मोही।।
जो हसि सो हसि मुहँ मसि लाई। आँखि ओट उठि बैठहिं जाई।।
दोहा/सोरठा
राम बिरोधी हृदय तें प्रगट कीन्ह बिधि मोहि।
मो समान को पातकी बादि कहउँ कछु तोहि।।162।।
चौपाई
bikala bilōki sutahi samujhāvati. manahuom jarē para lōnu lagāvati..
tāta rāu nahiṃ sōcē jōgū. biḍhai sukṛta jasu kīnhēu bhōgū..
jīvata sakala janama phala pāē. aṃta amarapati sadana sidhāē..
asa anumāni sōca pariharahū. sahita samāja rāja pura karahū..
suni suṭhi sahamēu rājakumārū. pākēṃ chata janu lāga aomgārū..
dhīraja dhari bhari lēhiṃ usāsā. pāpani sabahi bhāomti kula nāsā..
jauṃ pai kuruci rahī ati tōhī. janamata kāhē na mārē mōhī..
pēḍa kāṭi taiṃ pālau sīṃcā. mīna jiana niti bāri ulīcā..
चौपाई
jaba taiṃ kumati kumata jiyaom ṭhayaū. khaṃḍa khaṃḍa hōi hradau na gayaū..
bara māgata mana bhai nahiṃ pīrā. gari na jīha muhaom parēu na kīrā..
bhūpaom pratīta tōri kimi kīnhī. marana kāla bidhi mati hari līnhī..
bidhihuom na nāri hṛdaya gati jānī. sakala kapaṭa agha avaguna khānī..
sarala susīla dharama rata rāū. sō kimi jānai tīya subhāū..
asa kō jīva jaṃtu jaga māhīṃ. jēhi raghunātha prānapriya nāhīṃ..
bhē ati ahita rāmu tēu tōhī. kō tū ahasi satya kahu mōhī..
jō hasi sō hasi muhaom masi lāī. āomkhi ōṭa uṭhi baiṭhahiṃ jāī..
