चौपाई
बिलपहिं बिकल भरत दोउ भाई। कौसल्याँ लिए हृदयँ लगाई।।
भाँति अनेक भरतु समुझाए। कहि बिबेकमय बचन सुनाए।।
भरतहुँ मातु सकल समुझाईं। कहि पुरान श्रुति कथा सुहाईं।।
छल बिहीन सुचि सरल सुबानी। बोले भरत जोरि जुग पानी।।
जे अघ मातु पिता सुत मारें। गाइ गोठ महिसुर पुर जारें।।
जे अघ तिय बालक बध कीन्हें। मीत महीपति माहुर दीन्हें।।
जे पातक उपपातक अहहीं। करम बचन मन भव कबि कहहीं।।
ते पातक मोहि होहुँ बिधाता। जौं यहु होइ मोर मत माता।।
दोहा/सोरठा
जे परिहरि हरि हर चरन भजहिं भूतगन घोर।
तेहि कइ गति मोहि देउ बिधि जौं जननी मत मोर।।167।।
चौपाई
बेचहिं बेदु धरमु दुहि लेहीं। पिसुन पराय पाप कहि देहीं।।
कपटी कुटिल कलहप्रिय क्रोधी। बेद बिदूषक बिस्व बिरोधी।।
लोभी लंपट लोलुपचारा। जे ताकहिं परधनु परदारा।।
पावौं मैं तिन्ह के गति घोरा। जौं जननी यहु संमत मोरा।।
जे नहिं साधुसंग अनुरागे। परमारथ पथ बिमुख अभागे।।
जे न भजहिं हरि नरतनु पाई। जिन्हहि न हरि हर सुजसु सोहाई।।
तजि श्रुतिपंथु बाम पथ चलहीं। बंचक बिरचि बेष जगु छलहीं।।
तिन्ह कै गति मोहि संकर देऊ। जननी जौं यहु जानौं भेऊ।।
दोहा/सोरठा
मातु भरत के बचन सुनि साँचे सरल सुभायँ।
कहति राम प्रिय तात तुम्ह सदा बचन मन कायँ।।168।।
चौपाई
bilapahiṃ bikala bharata dōu bhāī. kausalyāom liē hṛdayaom lagāī..
bhāomti anēka bharatu samujhāē. kahi bibēkamaya bacana sunāē..
bharatahuom mātu sakala samujhāīṃ. kahi purāna śruti kathā suhāīṃ..
chala bihīna suci sarala subānī. bōlē bharata jōri juga pānī..
jē agha mātu pitā suta mārēṃ. gāi gōṭha mahisura pura jārēṃ..
jē agha tiya bālaka badha kīnhēṃ. mīta mahīpati māhura dīnhēṃ..
jē pātaka upapātaka ahahīṃ. karama bacana mana bhava kabi kahahīṃ..
tē pātaka mōhi hōhuom bidhātā. jauṃ yahu hōi mōra mata mātā..
चौपाई
bēcahiṃ bēdu dharamu duhi lēhīṃ. pisuna parāya pāpa kahi dēhīṃ..
kapaṭī kuṭila kalahapriya krōdhī. bēda bidūṣaka bisva birōdhī..
lōbhī laṃpaṭa lōlupacārā. jē tākahiṃ paradhanu paradārā..
pāvauṃ maiṃ tinha kē gati ghōrā. jauṃ jananī yahu saṃmata mōrā..
jē nahiṃ sādhusaṃga anurāgē. paramāratha patha bimukha abhāgē..
jē na bhajahiṃ hari naratanu pāī. jinhahi na hari hara sujasu sōhāī..
taji śrutipaṃthu bāma patha calahīṃ. baṃcaka biraci bēṣa jagu chalahīṃ..
tinha kai gati mōhi saṃkara dēū. jananī jauṃ yahu jānauṃ bhēū..
