चौपाई
राम प्रानहु तें प्रान तुम्हारे। तुम्ह रघुपतिहि प्रानहु तें प्यारे।।
बिधु बिष चवै स्त्रवै हिमु आगी। होइ बारिचर बारि बिरागी।।
भएँ ग्यानु बरु मिटै न मोहू। तुम्ह रामहि प्रतिकूल न होहू।।
मत तुम्हार यहु जो जग कहहीं। सो सपनेहुँ सुख सुगति न लहहीं।।
अस कहि मातु भरतु हियँ लाए। थन पय स्त्रवहिं नयन जल छाए।।
करत बिलाप बहुत यहि भाँती। बैठेहिं बीति गइ सब राती।।
बामदेउ बसिष्ठ तब आए। सचिव महाजन सकल बोलाए।।
मुनि बहु भाँति भरत उपदेसे। कहि परमारथ बचन सुदेसे।।
दोहा/सोरठा
तात हृदयँ धीरजु धरहु करहु जो अवसर आजु।
उठे भरत गुर बचन सुनि करन कहेउ सबु साजु।।169।।
चौपाई
नृपतनु बेद बिदित अन्हवावा। परम बिचित्र बिमानु बनावा।।
गहि पद भरत मातु सब राखी। रहीं रानि दरसन अभिलाषी।।
चंदन अगर भार बहु आए। अमित अनेक सुगंध सुहाए।।
सरजु तीर रचि चिता बनाई। जनु सुरपुर सोपान सुहाई।।
एहि बिधि दाह क्रिया सब कीन्ही। बिधिवत न्हाइ तिलांजुलि दीन्ही।।
सोधि सुमृति सब बेद पुराना। कीन्ह भरत दसगात बिधाना।।
जहँ जस मुनिबर आयसु दीन्हा। तहँ तस सहस भाँति सबु कीन्हा।।
भए बिसुद्ध दिए सब दाना। धेनु बाजि गज बाहन नाना।।
दोहा/सोरठा
सिंघासन भूषन बसन अन्न धरनि धन धाम।
दिए भरत लहि भूमिसुर भे परिपूरन काम।।170।।
चौपाई
rāma prānahu tēṃ prāna tumhārē. tumha raghupatihi prānahu tēṃ pyārē..
bidhu biṣa cavai stravai himu āgī. hōi bāricara bāri birāgī..
bhaēom gyānu baru miṭai na mōhū. tumha rāmahi pratikūla na hōhū..
mata tumhāra yahu jō jaga kahahīṃ. sō sapanēhuom sukha sugati na lahahīṃ..
asa kahi mātu bharatu hiyaom lāē. thana paya stravahiṃ nayana jala chāē..
karata bilāpa bahuta yahi bhāomtī. baiṭhēhiṃ bīti gai saba rātī..
bāmadēu basiṣṭha taba āē. saciva mahājana sakala bōlāē..
muni bahu bhāomti bharata upadēsē. kahi paramāratha bacana sudēsē..
चौपाई
nṛpatanu bēda bidita anhavāvā. parama bicitra bimānu banāvā..
gahi pada bharata mātu saba rākhī. rahīṃ rāni darasana abhilāṣī..
caṃdana agara bhāra bahu āē. amita anēka sugaṃdha suhāē..
saraju tīra raci citā banāī. janu surapura sōpāna suhāī..
ēhi bidhi dāha kriyā saba kīnhī. bidhivata nhāi tilāṃjuli dīnhī..
sōdhi sumṛti saba bēda purānā. kīnha bharata dasagāta bidhānā..
jahaom jasa munibara āyasu dīnhā. tahaom tasa sahasa bhāomti sabu kīnhā..
bhaē bisuddha diē saba dānā. dhēnu bāji gaja bāhana nānā..
