चौपाई
पितु हित भरत कीन्हि जसि करनी। सो मुख लाख जाइ नहिं बरनी।।
सुदिनु सोधि मुनिबर तब आए। सचिव महाजन सकल बोलाए।।
बैठे राजसभाँ सब जाई। पठए बोलि भरत दोउ भाई।।
भरतु बसिष्ठ निकट बैठारे। नीति धरममय बचन उचारे।।
प्रथम कथा सब मुनिबर बरनी। कैकइ कुटिल कीन्हि जसि करनी।।
भूप धरमब्रतु सत्य सराहा। जेहिं तनु परिहरि प्रेमु निबाहा।।
कहत राम गुन सील सुभाऊ। सजल नयन पुलकेउ मुनिराऊ।।
बहुरि लखन सिय प्रीति बखानी। सोक सनेह मगन मुनि ग्यानी।।
दोहा/सोरठा
सुनहु भरत भावी प्रबल बिलखि कहेउ मुनिनाथ।
हानि लाभु जीवन मरनु जसु अपजसु बिधि हाथ।।171।।
चौपाई
अस बिचारि केहि देइअ दोसू। ब्यरथ काहि पर कीजिअ रोसू।।
तात बिचारु केहि करहु मन माहीं। सोच जोगु दसरथु नृपु नाहीं।।
सोचिअ बिप्र जो बेद बिहीना। तजि निज धरमु बिषय लयलीना।।
सोचिअ नृपति जो नीति न जाना। जेहि न प्रजा प्रिय प्रान समाना।।
सोचिअ बयसु कृपन धनवानू। जो न अतिथि सिव भगति सुजानू।।
सोचिअ सूद्रु बिप्र अवमानी। मुखर मानप्रिय ग्यान गुमानी।।
सोचिअ पुनि पति बंचक नारी। कुटिल कलहप्रिय इच्छाचारी।।
सोचिअ बटु निज ब्रतु परिहरई। जो नहिं गुर आयसु अनुसरई।।
दोहा/सोरठा
सोचिअ गृही जो मोह बस करइ करम पथ त्याग।
सोचिअ जति प्रंपच रत बिगत बिबेक बिराग।।172।।
चौपाई
pitu hita bharata kīnhi jasi karanī. sō mukha lākha jāi nahiṃ baranī..
sudinu sōdhi munibara taba āē. saciva mahājana sakala bōlāē..
baiṭhē rājasabhāom saba jāī. paṭhaē bōli bharata dōu bhāī..
bharatu basiṣṭha nikaṭa baiṭhārē. nīti dharamamaya bacana ucārē..
prathama kathā saba munibara baranī. kaikai kuṭila kīnhi jasi karanī..
bhūpa dharamabratu satya sarāhā. jēhiṃ tanu parihari prēmu nibāhā..
kahata rāma guna sīla subhāū. sajala nayana pulakēu munirāū..
bahuri lakhana siya prīti bakhānī. sōka sanēha magana muni gyānī..
चौपाई
asa bicāri kēhi dēia dōsū. byaratha kāhi para kījia rōsū..
tāta bicāru kēhi karahu mana māhīṃ. sōca jōgu dasarathu nṛpu nāhīṃ..
sōcia bipra jō bēda bihīnā. taji nija dharamu biṣaya layalīnā..
sōcia nṛpati jō nīti na jānā. jēhi na prajā priya prāna samānā..
sōcia bayasu kṛpana dhanavānū. jō na atithi siva bhagati sujānū..
sōcia sūdru bipra avamānī. mukhara mānapriya gyāna gumānī..
sōcia puni pati baṃcaka nārī. kuṭila kalahapriya icchācārī..
sōcia baṭu nija bratu pariharaī. jō nahiṃ gura āyasu anusaraī..
