चौपाई
मोहि उपदेसु दीन्ह गुर नीका। प्रजा सचिव संमत सबही का।।
मातु उचित धरि आयसु दीन्हा। अवसि सीस धरि चाहउँ कीन्हा।।
गुर पितु मातु स्वामि हित बानी। सुनि मन मुदित करिअ भलि जानी।।
उचित कि अनुचित किएँ बिचारू। धरमु जाइ सिर पातक भारू।।
तुम्ह तौ देहु सरल सिख सोई। जो आचरत मोर भल होई।।
जद्यपि यह समुझत हउँ नीकें। तदपि होत परितोषु न जी कें।।
अब तुम्ह बिनय मोरि सुनि लेहू। मोहि अनुहरत सिखावनु देहू।।
ऊतरु देउँ छमब अपराधू। दुखित दोष गुन गनहिं न साधू।।
दोहा/सोरठा
पितु सुरपुर सिय रामु बन करन कहहु मोहि राजु।
एहि तें जानहु मोर हित कै आपन बड़ काजु।।177।।
चौपाई
हित हमार सियपति सेवकाई। सो हरि लीन्ह मातु कुटिलाई।।
मैं अनुमानि दीख मन माहीं। आन उपायँ मोर हित नाहीं।।
सोक समाजु राजु केहि लेखें। लखन राम सिय बिनु पद देखें।।
बादि बसन बिनु भूषन भारू। बादि बिरति बिनु ब्रह्म बिचारू।।
सरुज सरीर बादि बहु भोगा। बिनु हरिभगति जायँ जप जोगा।।
जायँ जीव बिनु देह सुहाई। बादि मोर सबु बिनु रघुराई।।
जाउँ राम पहिं आयसु देहू। एकहिं आँक मोर हित एहू।।
मोहि नृप करि भल आपन चहहू। सोउ सनेह जड़ता बस कहहू।।
दोहा/सोरठा
कैकेई सुअ कुटिलमति राम बिमुख गतलाज।
तुम्ह चाहत सुखु मोहबस मोहि से अधम कें राज।।178।।
चौपाई
mōhi upadēsu dīnha gura nīkā. prajā saciva saṃmata sabahī kā..
mātu ucita dhari āyasu dīnhā. avasi sīsa dhari cāhauom kīnhā..
gura pitu mātu svāmi hita bānī. suni mana mudita karia bhali jānī..
ucita ki anucita kiēom bicārū. dharamu jāi sira pātaka bhārū..
tumha tau dēhu sarala sikha sōī. jō ācarata mōra bhala hōī..
jadyapi yaha samujhata hauom nīkēṃ. tadapi hōta paritōṣu na jī kēṃ..
aba tumha binaya mōri suni lēhū. mōhi anuharata sikhāvanu dēhū..
ūtaru dēuom chamaba aparādhū. dukhita dōṣa guna ganahiṃ na sādhū..
चौपाई
hita hamāra siyapati sēvakāī. sō hari līnha mātu kuṭilāī..
maiṃ anumāni dīkha mana māhīṃ. āna upāyaom mōra hita nāhīṃ..
sōka samāju rāju kēhi lēkhēṃ. lakhana rāma siya binu pada dēkhēṃ..
bādi basana binu bhūṣana bhārū. bādi birati binu brahma bicārū..
saruja sarīra bādi bahu bhōgā. binu haribhagati jāyaom japa jōgā..
jāyaom jīva binu dēha suhāī. bādi mōra sabu binu raghurāī..
jāuom rāma pahiṃ āyasu dēhū. ēkahiṃ āomka mōra hita ēhū..
mōhi nṛpa kari bhala āpana cahahū. sōu sanēha jaḍatā basa kahahū..
