चौपाई
बंदउ गुरु पद पदुम परागा। सुरुचि सुबास सरस अनुरागा।।
अमिय मूरिमय चूरन चारू। समन सकल भव रुज परिवारू।।
सुकृति संभु तन बिमल बिभूती। मंजुल मंगल मोद प्रसूती।।
जन मन मंजु मुकुर मल हरनी। किएँ तिलक गुन गन बस करनी।।
श्रीगुर पद नख मनि गन जोती। सुमिरत दिब्य द्रृष्टि हियँ होती।।
दलन मोह तम सो सप्रकासू। बड़े भाग उर आवइ जासू।।
उघरहिं बिमल बिलोचन ही के। मिटहिं दोष दुख भव रजनी के।।
सूझहिं राम चरित मनि मानिक। गुपुत प्रगट जहँ जो जेहि खानिक।।
दोहा/सोरठा
जथा सुअंजन अंजि दृग साधक सिद्ध सुजान।
कौतुक देखत सैल बन भूतल भूरि निधान।।1।।
चौपाई
गुरु पद रज मृदु मंजुल अंजन। नयन अमिअ दृग दोष बिभंजन।।
तेहिं करि बिमल बिबेक बिलोचन। बरनउँ राम चरित भव मोचन।।
बंदउँ प्रथम महीसुर चरना। मोह जनित संसय सब हरना।।
सुजन समाज सकल गुन खानी। करउँ प्रनाम सप्रेम सुबानी।।
साधु चरित सुभ चरित कपासू। निरस बिसद गुनमय फल जासू।।
जो सहि दुख परछिद्र दुरावा। बंदनीय जेहिं जग जस पावा।।
मुद मंगलमय संत समाजू। जो जग जंगम तीरथराजू।।
राम भक्ति जहँ सुरसरि धारा। सरसइ ब्रह्म बिचार प्रचारा।।
बिधि निषेधमय कलि मल हरनी। करम कथा रबिनंदनि बरनी।।
हरि हर कथा बिराजति बेनी। सुनत सकल मुद मंगल देनी।।
बटु बिस्वास अचल निज धरमा। तीरथराज समाज सुकरमा।।
सबहिं सुलभ सब दिन सब देसा। सेवत सादर समन कलेसा।।
अकथ अलौकिक तीरथराऊ। देइ सद्य फल प्रगट प्रभाऊ।।
दोहा/सोरठा
सुनि समुझहिं जन मुदित मन मज्जहिं अति अनुराग।
लहहिं चारि फल अछत तनु साधु समाज प्रयाग।।2।।
चौपाई
baṃdau guru pada paduma parāgā. suruci subāsa sarasa anurāgā..
amiya mūrimaya cūrana cārū. samana sakala bhava ruja parivārū..
sukṛti saṃbhu tana bimala bibhūtī. maṃjula maṃgala mōda prasūtī..
jana mana maṃju mukura mala haranī. kiēom tilaka guna gana basa karanī..
śrīgura pada nakha mani gana jōtī. sumirata dibya drṛṣṭi hiyaom hōtī..
dalana mōha tama sō saprakāsū. baḍaē bhāga ura āvai jāsū..
ugharahiṃ bimala bilōcana hī kē. miṭahiṃ dōṣa dukha bhava rajanī kē..
sūjhahiṃ rāma carita mani mānika. guputa pragaṭa jahaom jō jēhi khānika..
चौपाई
guru pada raja mṛdu maṃjula aṃjana. nayana amia dṛga dōṣa bibhaṃjana..
tēhiṃ kari bimala bibēka bilōcana. baranauom rāma carita bhava mōcana..
baṃdauom prathama mahīsura caranā. mōha janita saṃsaya saba haranā..
sujana samāja sakala guna khānī. karauom pranāma saprēma subānī..
sādhu carita subha carita kapāsū. nirasa bisada gunamaya phala jāsū..
jō sahi dukha parachidra durāvā. baṃdanīya jēhiṃ jaga jasa pāvā..
muda maṃgalamaya saṃta samājū. jō jaga jaṃgama tīratharājū..
rāma bhakti jahaom surasari dhārā. sarasai brahma bicāra pracārā..
bidhi niṣēdhamaya kali mala haranī. karama kathā rabinaṃdani baranī..
hari hara kathā birājati bēnī. sunata sakala muda maṃgala dēnī..
baṭu bisvāsa acala nija dharamā. tīratharāja samāja sukaramā..
sabahiṃ sulabha saba dina saba dēsā. sēvata sādara samana kalēsā..
akatha alaukika tīratharāū. dēi sadya phala pragaṭa prabhāū..
