चौपाई
मज्जन फल पेखिअ ततकाला। काक होहिं पिक बकउ मराला।।
सुनि आचरज करै जनि कोई। सतसंगति महिमा नहिं गोई।।
बालमीक नारद घटजोनी। निज निज मुखनि कही निज होनी।।
जलचर थलचर नभचर नाना। जे जड़ चेतन जीव जहाना।।
मति कीरति गति भूति भलाई। जब जेहिं जतन जहाँ जेहिं पाई।।
सो जानब सतसंग प्रभाऊ। लोकहुँ बेद न आन उपाऊ।।
बिनु सतसंग बिबेक न होई। राम कृपा बिनु सुलभ न सोई।।
सतसंगत मुद मंगल मूला। सोइ फल सिधि सब साधन फूला।।
सठ सुधरहिं सतसंगति पाई। पारस परस कुधात सुहाई।।
बिधि बस सुजन कुसंगत परहीं। फनि मनि सम निज गुन अनुसरहीं।।
बिधि हरि हर कबि कोबिद बानी। कहत साधु महिमा सकुचानी।।
सो मो सन कहि जात न कैसें। साक बनिक मनि गुन गन जैसें।।
दोहा/सोरठा
बंदउँ संत समान चित हित अनहित नहिं कोइ।
अंजलि गत सुभ सुमन जिमि सम सुगंध कर दोइ।।3(क)।।
संत सरल चित जगत हित जानि सुभाउ सनेहु।
बालबिनय सुनि करि कृपा राम चरन रति देहु।।3(ख)।।
चौपाई
बहुरि बंदि खल गन सतिभाएँ। जे बिनु काज दाहिनेहु बाएँ।।
पर हित हानि लाभ जिन्ह केरें। उजरें हरष बिषाद बसेरें।।
हरि हर जस राकेस राहु से। पर अकाज भट सहसबाहु से।।
जे पर दोष लखहिं सहसाखी। पर हित घृत जिन्ह के मन माखी।।
तेज कृसानु रोष महिषेसा। अघ अवगुन धन धनी धनेसा।।
उदय केत सम हित सबही के। कुंभकरन सम सोवत नीके।।
पर अकाजु लगि तनु परिहरहीं। जिमि हिम उपल कृषी दलि गरहीं।।
बंदउँ खल जस सेष सरोषा। सहस बदन बरनइ पर दोषा।।
पुनि प्रनवउँ पृथुराज समाना। पर अघ सुनइ सहस दस काना।।
बहुरि सक्र सम बिनवउँ तेही। संतत सुरानीक हित जेही।।
बचन बज्र जेहि सदा पिआरा। सहस नयन पर दोष निहारा।।
दोहा/सोरठा
उदासीन अरि मीत हित सुनत जरहिं खल रीति।
जानि पानि जुग जोरि जन बिनती करइ सप्रीति।।4।।
चौपाई
majjana phala pēkhia tatakālā. kāka hōhiṃ pika bakau marālā..
suni ācaraja karai jani kōī. satasaṃgati mahimā nahiṃ gōī..
bālamīka nārada ghaṭajōnī. nija nija mukhani kahī nija hōnī..
jalacara thalacara nabhacara nānā. jē jaḍa cētana jīva jahānā..
mati kīrati gati bhūti bhalāī. jaba jēhiṃ jatana jahāom jēhiṃ pāī..
sō jānaba satasaṃga prabhāū. lōkahuom bēda na āna upāū..
binu satasaṃga bibēka na hōī. rāma kṛpā binu sulabha na sōī..
satasaṃgata muda maṃgala mūlā. sōi phala sidhi saba sādhana phūlā..
saṭha sudharahiṃ satasaṃgati pāī. pārasa parasa kudhāta suhāī..
bidhi basa sujana kusaṃgata parahīṃ. phani mani sama nija guna anusarahīṃ..
bidhi hari hara kabi kōbida bānī. kahata sādhu mahimā sakucānī..
sō mō sana kahi jāta na kaisēṃ. sāka banika mani guna gana jaisēṃ..
चौपाई
bahuri baṃdi khala gana satibhāēom. jē binu kāja dāhinēhu bāēom..
para hita hāni lābha jinha kērēṃ. ujarēṃ haraṣa biṣāda basērēṃ..
hari hara jasa rākēsa rāhu sē. para akāja bhaṭa sahasabāhu sē..
jē para dōṣa lakhahiṃ sahasākhī. para hita ghṛta jinha kē mana mākhī..
tēja kṛsānu rōṣa mahiṣēsā. agha avaguna dhana dhanī dhanēsā..
udaya kēta sama hita sabahī kē. kuṃbhakarana sama sōvata nīkē..
para akāju lagi tanu pariharahīṃ. jimi hima upala kṛṣī dali garahīṃ..
baṃdauom khala jasa sēṣa sarōṣā. sahasa badana baranai para dōṣā..
puni pranavauom pṛthurāja samānā. para agha sunai sahasa dasa kānā..
bahuri sakra sama binavauom tēhī. saṃtata surānīka hita jēhī..
bacana bajra jēhi sadā piārā. sahasa nayana para dōṣa nihārā..
दोहा/सोरठा
udāsīna ari mīta hita sunata jarahiṃ khala rīti.
jāni pāni juga jōri jana binatī karai saprīti..4..
