चौपाई
अरुन नयन उर बाहु बिसाला। नील जलज तनु स्याम तमाला।।
कटि पट पीत कसें बर भाथा। रुचिर चाप सायक दुहुँ हाथा।।
स्याम गौर सुंदर दोउ भाई। बिस्बामित्र महानिधि पाई।।
प्रभु ब्रह्मन्यदेव मै जाना। मोहि निति पिता तजेहु भगवाना।।
चले जात मुनि दीन्हि दिखाई। सुनि ताड़का क्रोध करि धाई।।
एकहिं बान प्रान हरि लीन्हा। दीन जानि तेहि निज पद दीन्हा।।
तब रिषि निज नाथहि जियँ चीन्ही। बिद्यानिधि कहुँ बिद्या दीन्ही।।
जाते लाग न छुधा पिपासा। अतुलित बल तनु तेज प्रकासा।।
दोहा/सोरठा
आयुष सब समर्पि कै प्रभु निज आश्रम आनि।
कंद मूल फल भोजन दीन्ह भगति हित जानि।।209।।
चौपाई
प्रात कहा मुनि सन रघुराई। निर्भय जग्य करहु तुम्ह जाई।।
होम करन लागे मुनि झारी। आपु रहे मख कीं रखवारी।।
सुनि मारीच निसाचर क्रोही। लै सहाय धावा मुनिद्रोही।।
बिनु फर बान राम तेहि मारा। सत जोजन गा सागर पारा।।
पावक सर सुबाहु पुनि मारा। अनुज निसाचर कटकु सँघारा।।
मारि असुर द्विज निर्मयकारी। अस्तुति करहिं देव मुनि झारी।।
तहँ पुनि कछुक दिवस रघुराया। रहे कीन्हि बिप्रन्ह पर दाया।।
भगति हेतु बहु कथा पुराना। कहे बिप्र जद्यपि प्रभु जाना।।
तब मुनि सादर कहा बुझाई। चरित एक प्रभु देखिअ जाई।।
धनुषजग्य मुनि रघुकुल नाथा। हरषि चले मुनिबर के साथा।।
आश्रम एक दीख मग माहीं। खग मृग जीव जंतु तहँ नाहीं।।
पूछा मुनिहि सिला प्रभु देखी। सकल कथा मुनि कहा बिसेषी।।
दोहा/सोरठा
गौतम नारि श्राप बस उपल देह धरि धीर।
चरन कमल रज चाहति कृपा करहु रघुबीर।।210।।
चौपाई
aruna nayana ura bāhu bisālā. nīla jalaja tanu syāma tamālā..
kaṭi paṭa pīta kasēṃ bara bhāthā. rucira cāpa sāyaka duhuom hāthā..
syāma gaura suṃdara dōu bhāī. bisbāmitra mahānidhi pāī..
prabhu brahmanyadēva mai jānā. mōhi niti pitā tajēhu bhagavānā..
calē jāta muni dīnhi dikhāī. suni tāḍakā krōdha kari dhāī..
ēkahiṃ bāna prāna hari līnhā. dīna jāni tēhi nija pada dīnhā..
taba riṣi nija nāthahi jiyaom cīnhī. bidyānidhi kahuom bidyā dīnhī..
jātē lāga na chudhā pipāsā. atulita bala tanu tēja prakāsā..
चौपाई
prāta kahā muni sana raghurāī. nirbhaya jagya karahu tumha jāī..
hōma karana lāgē muni jhārī. āpu rahē makha kīṃ rakhavārī..
suni mārīca nisācara krōhī. lai sahāya dhāvā munidrōhī..
binu phara bāna rāma tēhi mārā. sata jōjana gā sāgara pārā..
pāvaka sara subāhu puni mārā. anuja nisācara kaṭaku saomghārā..
māri asura dvija nirmayakārī. astuti karahiṃ dēva muni jhārī..
tahaom puni kachuka divasa raghurāyā. rahē kīnhi bipranha para dāyā..
bhagati hētu bahu kathā purānā. kahē bipra jadyapi prabhu jānā..
taba muni sādara kahā bujhāī. carita ēka prabhu dēkhia jāī..
dhanuṣajagya muni raghukula nāthā. haraṣi calē munibara kē sāthā..
āśrama ēka dīkha maga māhīṃ. khaga mṛga jīva jaṃtu tahaom nāhīṃ..
pūchā munihi silā prabhu dēkhī. sakala kathā muni kahā bisēṣī..
