छंद
परसत पद पावन सोक नसावन प्रगट भई तपपुंज सही।
देखत रघुनायक जन सुख दायक सनमुख होइ कर जोरि रही।।
अति प्रेम अधीरा पुलक सरीरा मुख नहिं आवइ बचन कही।
अतिसय बड़भागी चरनन्हि लागी जुगल नयन जलधार बही।।
धीरजु मन कीन्हा प्रभु कहुँ चीन्हा रघुपति कृपाँ भगति पाई।
अति निर्मल बानीं अस्तुति ठानी ग्यानगम्य जय रघुराई।।
मै नारि अपावन प्रभु जग पावन रावन रिपु जन सुखदाई।
राजीव बिलोचन भव भय मोचन पाहि पाहि सरनहिं आई।।
मुनि श्राप जो दीन्हा अति भल कीन्हा परम अनुग्रह मैं माना।
देखेउँ भरि लोचन हरि भवमोचन इहइ लाभ संकर जाना।।
बिनती प्रभु मोरी मैं मति भोरी नाथ न मागउँ बर आना।
पद कमल परागा रस अनुरागा मम मन मधुप करै पाना।।
जेहिं पद सुरसरिता परम पुनीता प्रगट भई सिव सीस धरी।
सोइ पद पंकज जेहि पूजत अज मम सिर धरेउ कृपाल हरी।।
एहि भाँति सिधारी गौतम नारी बार बार हरि चरन परी।
जो अति मन भावा सो बरु पावा गै पतिलोक अनंद भरी।।
चौपाई
चले राम लछिमन मुनि संगा। गए जहाँ जग पावनि गंगा।।
गाधिसूनु सब कथा सुनाई। जेहि प्रकार सुरसरि महि आई।।
तब प्रभु रिषिन्ह समेत नहाए। बिबिध दान महिदेवन्हि पाए।।
हरषि चले मुनि बृंद सहाया। बेगि बिदेह नगर निअराया।।
पुर रम्यता राम जब देखी। हरषे अनुज समेत बिसेषी।।
बापीं कूप सरित सर नाना। सलिल सुधासम मनि सोपाना।।
गुंजत मंजु मत्त रस भृंगा। कूजत कल बहुबरन बिहंगा।।
बरन बरन बिकसे बन जाता। त्रिबिध समीर सदा सुखदाता।।
दोहा/सोरठा
सुमन बाटिका बाग बन बिपुल बिहंग निवास।
फूलत फलत सुपल्लवत सोहत पुर चहुँ पास।।212।।
छंद
parasata pada pāvana sōka nasāvana pragaṭa bhaī tapapuṃja sahī.
dēkhata raghunāyaka jana sukha dāyaka sanamukha hōi kara jōri rahī..
ati prēma adhīrā pulaka sarīrā mukha nahiṃ āvai bacana kahī.
atisaya baḍabhāgī carananhi lāgī jugala nayana jaladhāra bahī..
dhīraju mana kīnhā prabhu kahuom cīnhā raghupati kṛpāom bhagati pāī.
ati nirmala bānīṃ astuti ṭhānī gyānagamya jaya raghurāī..
mai nāri apāvana prabhu jaga pāvana rāvana ripu jana sukhadāī.
rājīva bilōcana bhava bhaya mōcana pāhi pāhi saranahiṃ āī..
muni śrāpa jō dīnhā ati bhala kīnhā parama anugraha maiṃ mānā.
dēkhēuom bhari lōcana hari bhavamōcana ihai lābha saṃkara jānā..
binatī prabhu mōrī maiṃ mati bhōrī nātha na māgauom bara ānā.
pada kamala parāgā rasa anurāgā mama mana madhupa karai pānā..
jēhiṃ pada surasaritā parama punītā pragaṭa bhaī siva sīsa dharī.
sōi pada paṃkaja jēhi pūjata aja mama sira dharēu kṛpāla harī..
ēhi bhāomti sidhārī gautama nārī bāra bāra hari carana parī.
jō ati mana bhāvā sō baru pāvā gai patilōka anaṃda bharī..
चौपाई
calē rāma lachimana muni saṃgā. gaē jahāom jaga pāvani gaṃgā..
gādhisūnu saba kathā sunāī. jēhi prakāra surasari mahi āī..
taba prabhu riṣinha samēta nahāē. bibidha dāna mahidēvanhi pāē..
haraṣi calē muni bṛṃda sahāyā. bēgi bidēha nagara niarāyā..
pura ramyatā rāma jaba dēkhī. haraṣē anuja samēta bisēṣī..
bāpīṃ kūpa sarita sara nānā. salila sudhāsama mani sōpānā..
guṃjata maṃju matta rasa bhṛṃgā. kūjata kala bahubarana bihaṃgā..
barana barana bikasē bana jātā. tribidha samīra sadā sukhadātā..
