चौपाई
मुनि पद कमल बंदि दोउ भ्राता। चले लोक लोचन सुख दाता।।
बालक बृंदि देखि अति सोभा। लगे संग लोचन मनु लोभा।।
पीत बसन परिकर कटि भाथा। चारु चाप सर सोहत हाथा।।
तन अनुहरत सुचंदन खोरी। स्यामल गौर मनोहर जोरी।।
केहरि कंधर बाहु बिसाला। उर अति रुचिर नागमनि माला।।
सुभग सोन सरसीरुह लोचन। बदन मयंक तापत्रय मोचन।।
कानन्हि कनक फूल छबि देहीं। चितवत चितहि चोरि जनु लेहीं।।
चितवनि चारु भृकुटि बर बाँकी। तिलक रेखा सोभा जनु चाँकी।।
दोहा/सोरठा
रुचिर चौतनीं सुभग सिर मेचक कुंचित केस।
नख सिख सुंदर बंधु दोउ सोभा सकल सुदेस।।219।।
चौपाई
देखन नगरु भूपसुत आए। समाचार पुरबासिन्ह पाए।।
धाए धाम काम सब त्यागी। मनहु रंक निधि लूटन लागी।।
निरखि सहज सुंदर दोउ भाई। होहिं सुखी लोचन फल पाई।।
जुबतीं भवन झरोखन्हि लागीं। निरखहिं राम रूप अनुरागीं।।
कहहिं परसपर बचन सप्रीती। सखि इन्ह कोटि काम छबि जीती।।
सुर नर असुर नाग मुनि माहीं। सोभा असि कहुँ सुनिअति नाहीं।।
बिष्नु चारि भुज बिघि मुख चारी। बिकट बेष मुख पंच पुरारी।।
अपर देउ अस कोउ न आही। यह छबि सखि पटतरिअ जाही।।
दोहा/सोरठा
बय किसोर सुषमा सदन स्याम गौर सुख घाम।
अंग अंग पर वारिअहिं कोटि कोटि सत काम।।220।।
चौपाई
muni pada kamala baṃdi dōu bhrātā. calē lōka lōcana sukha dātā..
bālaka bṛṃdi dēkhi ati sōbhā. lagē saṃga lōcana manu lōbhā..
pīta basana parikara kaṭi bhāthā. cāru cāpa sara sōhata hāthā..
tana anuharata sucaṃdana khōrī. syāmala gaura manōhara jōrī..
kēhari kaṃdhara bāhu bisālā. ura ati rucira nāgamani mālā..
subhaga sōna sarasīruha lōcana. badana mayaṃka tāpatraya mōcana..
kānanhi kanaka phūla chabi dēhīṃ. citavata citahi cōri janu lēhīṃ..
citavani cāru bhṛkuṭi bara bāomkī. tilaka rēkhā sōbhā janu cāomkī..
चौपाई
dēkhana nagaru bhūpasuta āē. samācāra purabāsinha pāē..
dhāē dhāma kāma saba tyāgī. manahu raṃka nidhi lūṭana lāgī..
nirakhi sahaja suṃdara dōu bhāī. hōhiṃ sukhī lōcana phala pāī..
jubatīṃ bhavana jharōkhanhi lāgīṃ. nirakhahiṃ rāma rūpa anurāgīṃ..
kahahiṃ parasapara bacana saprītī. sakhi inha kōṭi kāma chabi jītī..
sura nara asura nāga muni māhīṃ. sōbhā asi kahuom suniati nāhīṃ..
biṣnu cāri bhuja bighi mukha cārī. bikaṭa bēṣa mukha paṃca purārī..
apara dēu asa kōu na āhī. yaha chabi sakhi paṭataria jāhī..
