चौपाई
मुनि तव चरन देखि कह राऊ। कहि न सकउँ निज पुन्य प्राभाऊ।।
सुंदर स्याम गौर दोउ भ्राता। आनँदहू के आनँद दाता।।
इन्ह कै प्रीति परसपर पावनि। कहि न जाइ मन भाव सुहावनि।।
सुनहु नाथ कह मुदित बिदेहू। ब्रह्म जीव इव सहज सनेहू।।
पुनि पुनि प्रभुहि चितव नरनाहू। पुलक गात उर अधिक उछाहू।।
म्रुनिहि प्रसंसि नाइ पद सीसू। चलेउ लवाइ नगर अवनीसू।।
सुंदर सदनु सुखद सब काला। तहाँ बासु लै दीन्ह भुआला।।
करि पूजा सब बिधि सेवकाई। गयउ राउ गृह बिदा कराई।।
दोहा/सोरठा
रिषय संग रघुबंस मनि करि भोजनु बिश्रामु।
बैठे प्रभु भ्राता सहित दिवसु रहा भरि जामु।।217।।
चौपाई
लखन हृदयँ लालसा बिसेषी। जाइ जनकपुर आइअ देखी।।
प्रभु भय बहुरि मुनिहि सकुचाहीं। प्रगट न कहहिं मनहिं मुसुकाहीं।।
राम अनुज मन की गति जानी। भगत बछलता हिंयँ हुलसानी।।
परम बिनीत सकुचि मुसुकाई। बोले गुर अनुसासन पाई।।
नाथ लखनु पुरु देखन चहहीं। प्रभु सकोच डर प्रगट न कहहीं।।
जौं राउर आयसु मैं पावौं। नगर देखाइ तुरत लै आवौ।।
सुनि मुनीसु कह बचन सप्रीती। कस न राम तुम्ह राखहु नीती।।
धरम सेतु पालक तुम्ह ताता। प्रेम बिबस सेवक सुखदाता।।
दोहा/सोरठा
जाइ देखी आवहु नगरु सुख निधान दोउ भाइ।
करहु सुफल सब के नयन सुंदर बदन देखाइ।।218।।
चौपाई
muni tava carana dēkhi kaha rāū. kahi na sakauom nija punya prābhāū..
suṃdara syāma gaura dōu bhrātā. ānaomdahū kē ānaomda dātā..
inha kai prīti parasapara pāvani. kahi na jāi mana bhāva suhāvani..
sunahu nātha kaha mudita bidēhū. brahma jīva iva sahaja sanēhū..
puni puni prabhuhi citava naranāhū. pulaka gāta ura adhika uchāhū..
mrunihi prasaṃsi nāi pada sīsū. calēu lavāi nagara avanīsū..
suṃdara sadanu sukhada saba kālā. tahāom bāsu lai dīnha bhuālā..
kari pūjā saba bidhi sēvakāī. gayau rāu gṛha bidā karāī..
चौपाई
lakhana hṛdayaom lālasā bisēṣī. jāi janakapura āia dēkhī..
prabhu bhaya bahuri munihi sakucāhīṃ. pragaṭa na kahahiṃ manahiṃ musukāhīṃ..
rāma anuja mana kī gati jānī. bhagata bachalatā hiṃyaom hulasānī..
parama binīta sakuci musukāī. bōlē gura anusāsana pāī..
nātha lakhanu puru dēkhana cahahīṃ. prabhu sakōca ḍara pragaṭa na kahahīṃ..
jauṃ rāura āyasu maiṃ pāvauṃ. nagara dēkhāi turata lai āvau..
suni munīsu kaha bacana saprītī. kasa na rāma tumha rākhahu nītī..
dharama sētu pālaka tumha tātā. prēma bibasa sēvaka sukhadātā..
