चौपाई
झाँझि मृदंग संख सहनाई। भेरि ढोल दुंदुभी सुहाई।।
बाजहिं बहु बाजने सुहाए। जहँ तहँ जुबतिन्ह मंगल गाए।।
सखिन्ह सहित हरषी अति रानी। सूखत धान परा जनु पानी।।
जनक लहेउ सुखु सोचु बिहाई। पैरत थकें थाह जनु पाई।।
श्रीहत भए भूप धनु टूटे। जैसें दिवस दीप छबि छूटे।।
सीय सुखहि बरनिअ केहि भाँती। जनु चातकी पाइ जलु स्वाती।।
रामहि लखनु बिलोकत कैसें। ससिहि चकोर किसोरकु जैसें।।
सतानंद तब आयसु दीन्हा। सीताँ गमनु राम पहिं कीन्हा।।
दोहा/सोरठा
संग सखीं सुदंर चतुर गावहिं मंगलचार।
गवनी बाल मराल गति सुषमा अंग अपार।।263।।
चौपाई
सखिन्ह मध्य सिय सोहति कैसे। छबिगन मध्य महाछबि जैसें।।
कर सरोज जयमाल सुहाई। बिस्व बिजय सोभा जेहिं छाई।।
तन सकोचु मन परम उछाहू। गूढ़ प्रेमु लखि परइ न काहू।।
जाइ समीप राम छबि देखी। रहि जनु कुँअरि चित्र अवरेखी।।
चतुर सखीं लखि कहा बुझाई। पहिरावहु जयमाल सुहाई।।
सुनत जुगल कर माल उठाई। प्रेम बिबस पहिराइ न जाई।।
सोहत जनु जुग जलज सनाला। ससिहि सभीत देत जयमाला।।
गावहिं छबि अवलोकि सहेली। सियँ जयमाल राम उर मेली।।
दोहा/सोरठा
रघुबर उर जयमाल देखि देव बरिसहिं सुमन।
सकुचे सकल भुआल जनु बिलोकि रबि कुमुदगन।।264।।
चौपाई
jhāomjhi mṛdaṃga saṃkha sahanāī. bhēri ḍhōla duṃdubhī suhāī..
bājahiṃ bahu bājanē suhāē. jahaom tahaom jubatinha maṃgala gāē..
sakhinha sahita haraṣī ati rānī. sūkhata dhāna parā janu pānī..
janaka lahēu sukhu sōcu bihāī. pairata thakēṃ thāha janu pāī..
śrīhata bhaē bhūpa dhanu ṭūṭē. jaisēṃ divasa dīpa chabi chūṭē..
sīya sukhahi barania kēhi bhāomtī. janu cātakī pāi jalu svātī..
rāmahi lakhanu bilōkata kaisēṃ. sasihi cakōra kisōraku jaisēṃ..
satānaṃda taba āyasu dīnhā. sītāom gamanu rāma pahiṃ kīnhā..
चौपाई
sakhinha madhya siya sōhati kaisē. chabigana madhya mahāchabi jaisēṃ..
kara sarōja jayamāla suhāī. bisva bijaya sōbhā jēhiṃ chāī..
tana sakōcu mana parama uchāhū. gūḍha prēmu lakhi parai na kāhū..
jāi samīpa rāma chabi dēkhī. rahi janu kuomari citra avarēkhī..
catura sakhīṃ lakhi kahā bujhāī. pahirāvahu jayamāla suhāī..
sunata jugala kara māla uṭhāī. prēma bibasa pahirāi na jāī..
sōhata janu juga jalaja sanālā. sasihi sabhīta dēta jayamālā..
gāvahiṃ chabi avalōki sahēlī. siyaom jayamāla rāma ura mēlī..
