चौपाई
तब संकर प्रभु पद सिरु नावा। सुमिरत रामु हृदयँ अस आवा।।
एहिं तन सतिहि भेट मोहि नाहीं। सिव संकल्पु कीन्ह मन माहीं।।
अस बिचारि संकरु मतिधीरा। चले भवन सुमिरत रघुबीरा।।
चलत गगन भै गिरा सुहाई। जय महेस भलि भगति दृढ़ाई।।
अस पन तुम्ह बिनु करइ को आना। रामभगत समरथ भगवाना।।
सुनि नभगिरा सती उर सोचा। पूछा सिवहि समेत सकोचा।।
कीन्ह कवन पन कहहु कृपाला। सत्यधाम प्रभु दीनदयाला।।
जदपि सतीं पूछा बहु भाँती। तदपि न कहेउ त्रिपुर आराती।।
दोहा/सोरठा
सतीं हृदय अनुमान किय सबु जानेउ सर्बग्य।
कीन्ह कपटु मैं संभु सन नारि सहज जड़ अग्य।।57क।।
जलु पय सरिस बिकाइ देखहु प्रीति कि रीति भलि।
बिलग होइ रसु जाइ कपट खटाई परत पुनि।।57ख।।
चौपाई
हृदयँ सोचु समुझत निज करनी। चिंता अमित जाइ नहि बरनी।।
कृपासिंधु सिव परम अगाधा। प्रगट न कहेउ मोर अपराधा।।
संकर रुख अवलोकि भवानी। प्रभु मोहि तजेउ हृदयँ अकुलानी।।
निज अघ समुझि न कछु कहि जाई। तपइ अवाँ इव उर अधिकाई।।
सतिहि ससोच जानि बृषकेतू। कहीं कथा सुंदर सुख हेतू।।
बरनत पंथ बिबिध इतिहासा। बिस्वनाथ पहुँचे कैलासा।।
तहँ पुनि संभु समुझि पन आपन। बैठे बट तर करि कमलासन।।
संकर सहज सरुप सम्हारा। लागि समाधि अखंड अपारा।।
दोहा/सोरठा
सती बसहि कैलास तब अधिक सोचु मन माहिं।
मरमु न कोऊ जान कछु जुग सम दिवस सिराहिं।।58।।
चौपाई
taba saṃkara prabhu pada siru nāvā. sumirata rāmu hṛdayaom asa āvā..
ēhiṃ tana satihi bhēṭa mōhi nāhīṃ. siva saṃkalpu kīnha mana māhīṃ..
asa bicāri saṃkaru matidhīrā. calē bhavana sumirata raghubīrā..
calata gagana bhai girā suhāī. jaya mahēsa bhali bhagati dṛḍhaāī..
asa pana tumha binu karai kō ānā. rāmabhagata samaratha bhagavānā..
suni nabhagirā satī ura sōcā. pūchā sivahi samēta sakōcā..
kīnha kavana pana kahahu kṛpālā. satyadhāma prabhu dīnadayālā..
jadapi satīṃ pūchā bahu bhāomtī. tadapi na kahēu tripura ārātī..
चौपाई
hṛdayaom sōcu samujhata nija karanī. ciṃtā amita jāi nahi baranī..
kṛpāsiṃdhu siva parama agādhā. pragaṭa na kahēu mōra aparādhā..
saṃkara rukha avalōki bhavānī. prabhu mōhi tajēu hṛdayaom akulānī..
nija agha samujhi na kachu kahi jāī. tapai avāom iva ura adhikāī..
satihi sasōca jāni bṛṣakētū. kahīṃ kathā suṃdara sukha hētū..
baranata paṃtha bibidha itihāsā. bisvanātha pahuomcē kailāsā..
tahaom puni saṃbhu samujhi pana āpana. baiṭhē baṭa tara kari kamalāsana..
saṃkara sahaja sarupa samhārā. lāgi samādhi akhaṃḍa apārā..
