चौपाई
अस बिबेक जब देइ बिधाता। तब तजि दोष गुनहिं मनु राता।।
काल सुभाउ करम बरिआई। भलेउ प्रकृति बस चुकइ भलाई।।
सो सुधारि हरिजन जिमि लेहीं। दलि दुख दोष बिमल जसु देहीं।।
खलउ करहिं भल पाइ सुसंगू। मिटइ न मलिन सुभाउ अभंगू।।
लखि सुबेष जग बंचक जेऊ। बेष प्रताप पूजिअहिं तेऊ।।
उधरहिं अंत न होइ निबाहू। कालनेमि जिमि रावन राहू।।
किएहुँ कुबेष साधु सनमानू। जिमि जग जामवंत हनुमानू।।
हानि कुसंग सुसंगति लाहू। लोकहुँ बेद बिदित सब काहू।।
गगन चढ़इ रज पवन प्रसंगा। कीचहिं मिलइ नीच जल संगा।।
साधु असाधु सदन सुक सारीं। सुमिरहिं राम देहिं गनि गारी।।
धूम कुसंगति कारिख होई। लिखिअ पुरान मंजु मसि सोई।।
सोइ जल अनल अनिल संघाता। होइ जलद जग जीवन दाता।।
दोहा/सोरठा
ग्रह भेषज जल पवन पट पाइ कुजोग सुजोग।
होहि कुबस्तु सुबस्तु जग लखहिं सुलच्छन लोग।।7(क)।।
सम प्रकास तम पाख दुहुँ नाम भेद बिधि कीन्ह।
ससि सोषक पोषक समुझि जग जस अपजस दीन्ह।।7(ख)।।
जड़ चेतन जग जीव जत सकल राममय जानि।
बंदउँ सब के पद कमल सदा जोरि जुग पानि।।7(ग)।।
देव दनुज नर नाग खग प्रेत पितर गंधर्ब।
बंदउँ किंनर रजनिचर कृपा करहु अब सर्ब।।7(घ)।।
चौपाई
आकर चारि लाख चौरासी। जाति जीव जल थल नभ बासी।।
सीय राममय सब जग जानी। करउँ प्रनाम जोरि जुग पानी।।
जानि कृपाकर किंकर मोहू। सब मिलि करहु छाड़ि छल छोहू।।
निज बुधि बल भरोस मोहि नाहीं। तातें बिनय करउँ सब पाही।।
करन चहउँ रघुपति गुन गाहा। लघु मति मोरि चरित अवगाहा।।
सूझ न एकउ अंग उपाऊ। मन मति रंक मनोरथ राऊ।।
मति अति नीच ऊँचि रुचि आछी। चहिअ अमिअ जग जुरइ न छाछी।।
छमिहहिं सज्जन मोरि ढिठाई। सुनिहहिं बालबचन मन लाई।।
जौ बालक कह तोतरि बाता। सुनहिं मुदित मन पितु अरु माता।।
हँसिहहि कूर कुटिल कुबिचारी। जे पर दूषन भूषनधारी।।
निज कवित केहि लाग न नीका। सरस होउ अथवा अति फीका।।
जे पर भनिति सुनत हरषाही। ते बर पुरुष बहुत जग नाहीं।।
जग बहु नर सर सरि सम भाई। जे निज बाढ़ि बढ़हिं जल पाई।।
सज्जन सकृत सिंधु सम कोई। देखि पूर बिधु बाढ़इ जोई।।
दोहा/सोरठा
भाग छोट अभिलाषु बड़ करउँ एक बिस्वास।
पैहहिं सुख सुनि सुजन सब खल करहहिं उपहास।।8।।
चौपाई
asa bibēka jaba dēi bidhātā. taba taji dōṣa gunahiṃ manu rātā..
kāla subhāu karama bariāī. bhalēu prakṛti basa cukai bhalāī..
sō sudhāri harijana jimi lēhīṃ. dali dukha dōṣa bimala jasu dēhīṃ..
khalau karahiṃ bhala pāi susaṃgū. miṭai na malina subhāu abhaṃgū..
lakhi subēṣa jaga baṃcaka jēū. bēṣa pratāpa pūjiahiṃ tēū..
udharahiṃ aṃta na hōi nibāhū. kālanēmi jimi rāvana rāhū..
kiēhuom kubēṣa sādhu sanamānū. jimi jaga jāmavaṃta hanumānū..
hāni kusaṃga susaṃgati lāhū. lōkahuom bēda bidita saba kāhū..
gagana caḍhai raja pavana prasaṃgā. kīcahiṃ milai nīca jala saṃgā..
sādhu asādhu sadana suka sārīṃ. sumirahiṃ rāma dēhiṃ gani gārī..
dhūma kusaṃgati kārikha hōī. likhia purāna maṃju masi sōī..
sōi jala anala anila saṃghātā. hōi jalada jaga jīvana dātā..
चौपाई
ākara cāri lākha caurāsī. jāti jīva jala thala nabha bāsī..
sīya rāmamaya saba jaga jānī. karauom pranāma jōri juga pānī..
jāni kṛpākara kiṃkara mōhū. saba mili karahu chāḍai chala chōhū..
nija budhi bala bharōsa mōhi nāhīṃ. tātēṃ binaya karauom saba pāhī..
karana cahauom raghupati guna gāhā. laghu mati mōri carita avagāhā..
sūjha na ēkau aṃga upāū. mana mati raṃka manōratha rāū..
mati ati nīca ūomci ruci āchī. cahia amia jaga jurai na chāchī..
chamihahiṃ sajjana mōri ḍhiṭhāī. sunihahiṃ bālabacana mana lāī..
jau bālaka kaha tōtari bātā. sunahiṃ mudita mana pitu aru mātā..
haomsihahi kūra kuṭila kubicārī. jē para dūṣana bhūṣanadhārī..
nija kavita kēhi lāga na nīkā. sarasa hōu athavā ati phīkā..
jē para bhaniti sunata haraṣāhī. tē bara puruṣa bahuta jaga nāhīṃ..
jaga bahu nara sara sari sama bhāī. jē nija bāḍhai baḍhahiṃ jala pāī..
sajjana sakṛta siṃdhu sama kōī. dēkhi pūra bidhu bāḍhai jōī..
