चौपाई
जसि बिबाह कै बिधि श्रुति गाई। महामुनिन्ह सो सब करवाई।।
गहि गिरीस कुस कन्या पानी। भवहि समरपीं जानि भवानी।।
पानिग्रहन जब कीन्ह महेसा। हिंयँ हरषे तब सकल सुरेसा।।
बेद मंत्र मुनिबर उच्चरहीं। जय जय जय संकर सुर करहीं।।
बाजहिं बाजन बिबिध बिधाना। सुमनबृष्टि नभ भै बिधि नाना।।
हर गिरिजा कर भयउ बिबाहू। सकल भुवन भरि रहा उछाहू।।
दासीं दास तुरग रथ नागा। धेनु बसन मनि बस्तु बिभागा।।
अन्न कनकभाजन भरि जाना। दाइज दीन्ह न जाइ बखाना।।
चौपाई
बहु बिधि संभु सास समुझाई। गवनी भवन चरन सिरु नाई।।
जननीं उमा बोलि तब लीन्ही। लै उछंग सुंदर सिख दीन्ही।।
करेहु सदा संकर पद पूजा। नारिधरमु पति देउ न दूजा।।
बचन कहत भरे लोचन बारी। बहुरि लाइ उर लीन्हि कुमारी।।
कत बिधि सृजीं नारि जग माहीं। पराधीन सपनेहुँ सुखु नाहीं।।
भै अति प्रेम बिकल महतारी। धीरजु कीन्ह कुसमय बिचारी।।
पुनि पुनि मिलति परति गहि चरना। परम प्रेम कछु जाइ न बरना।।
सब नारिन्ह मिलि भेटि भवानी। जाइ जननि उर पुनि लपटानी।।
चौपाई
jasi bibāha kai bidhi śruti gāī. mahāmuninha sō saba karavāī..
gahi girīsa kusa kanyā pānī. bhavahi samarapīṃ jāni bhavānī..
pānigrahana jaba kīnha mahēsā. hiṃyaom haraṣē taba sakala surēsā..
bēda maṃtra munibara uccarahīṃ. jaya jaya jaya saṃkara sura karahīṃ..
bājahiṃ bājana bibidha bidhānā. sumanabṛṣṭi nabha bhai bidhi nānā..
hara girijā kara bhayau bibāhū. sakala bhuvana bhari rahā uchāhū..
dāsīṃ dāsa turaga ratha nāgā. dhēnu basana mani bastu bibhāgā..
anna kanakabhājana bhari jānā. dāija dīnha na jāi bakhānā..
चौपाई
bahu bidhi saṃbhu sāsa samujhāī. gavanī bhavana carana siru nāī..
jananīṃ umā bōli taba līnhī. lai uchaṃga suṃdara sikha dīnhī..
karēhu sadā saṃkara pada pūjā. nāridharamu pati dēu na dūjā..
bacana kahata bharē lōcana bārī. bahuri lāi ura līnhi kumārī..
kata bidhi sṛjīṃ nāri jaga māhīṃ. parādhīna sapanēhuom sukhu nāhīṃ..
bhai ati prēma bikala mahatārī. dhīraju kīnha kusamaya bicārī..
puni puni milati parati gahi caranā. parama prēma kachu jāi na baranā..
saba nārinha mili bhēṭi bhavānī. jāi janani ura puni lapaṭānī..
