चौपाई
तदपि असंका कीन्हिहु सोई। कहत सुनत सब कर हित होई।।
जिन्ह हरि कथा सुनी नहिं काना। श्रवन रंध्र अहिभवन समाना।।
नयनन्हि संत दरस नहिं देखा। लोचन मोरपंख कर लेखा।।
ते सिर कटु तुंबरि समतूला। जे न नमत हरि गुर पद मूला।।
जिन्ह हरिभगति हृदयँ नहिं आनी। जीवत सव समान तेइ प्रानी।।
जो नहिं करइ राम गुन गाना। जीह सो दादुर जीह समाना।।
कुलिस कठोर निठुर सोइ छाती। सुनि हरिचरित न जो हरषाती।।
गिरिजा सुनहु राम कै लीला। सुर हित दनुज बिमोहनसीला।।
दोहा/सोरठा
रामकथा सुरधेनु सम सेवत सब सुख दानि।
सतसमाज सुरलोक सब को न सुनै अस जानि।।113।।
चौपाई
रामकथा सुंदर कर तारी। संसय बिहग उडावनिहारी।।
रामकथा कलि बिटप कुठारी। सादर सुनु गिरिराजकुमारी।।
राम नाम गुन चरित सुहाए। जनम करम अगनित श्रुति गाए।।
जथा अनंत राम भगवाना। तथा कथा कीरति गुन नाना।।
तदपि जथा श्रुत जसि मति मोरी। कहिहउँ देखि प्रीति अति तोरी।।
उमा प्रस्न तव सहज सुहाई। सुखद संतसंमत मोहि भाई।।
एक बात नहि मोहि सोहानी। जदपि मोह बस कहेहु भवानी।।
तुम जो कहा राम कोउ आना। जेहि श्रुति गाव धरहिं मुनि ध्याना।।
दोहा/सोरठा
कहहि सुनहि अस अधम नर ग्रसे जे मोह पिसाच।
पाषंडी हरि पद बिमुख जानहिं झूठ न साच।।114।।
चौपाई
tadapi asaṃkā kīnhihu sōī. kahata sunata saba kara hita hōī..
jinha hari kathā sunī nahiṃ kānā. śravana raṃdhra ahibhavana samānā..
nayananhi saṃta darasa nahiṃ dēkhā. lōcana mōrapaṃkha kara lēkhā..
tē sira kaṭu tuṃbari samatūlā. jē na namata hari gura pada mūlā..
jinha haribhagati hṛdayaom nahiṃ ānī. jīvata sava samāna tēi prānī..
jō nahiṃ karai rāma guna gānā. jīha sō dādura jīha samānā..
kulisa kaṭhōra niṭhura sōi chātī. suni haricarita na jō haraṣātī..
girijā sunahu rāma kai līlā. sura hita danuja bimōhanasīlā..
चौपाई
rāmakathā suṃdara kara tārī. saṃsaya bihaga uḍāvanihārī..
rāmakathā kali biṭapa kuṭhārī. sādara sunu girirājakumārī..
rāma nāma guna carita suhāē. janama karama aganita śruti gāē..
jathā anaṃta rāma bhagavānā. tathā kathā kīrati guna nānā..
tadapi jathā śruta jasi mati mōrī. kahihauom dēkhi prīti ati tōrī..
umā prasna tava sahaja suhāī. sukhada saṃtasaṃmata mōhi bhāī..
ēka bāta nahi mōhi sōhānī. jadapi mōha basa kahēhu bhavānī..
tuma jō kahā rāma kōu ānā. jēhi śruti gāva dharahiṃ muni dhyānā..
