चौपाई
मनि मानिक मुकुता छबि जैसी। अहि गिरि गज सिर सोह न तैसी।।
नृप किरीट तरुनी तनु पाई। लहहिं सकल सोभा अधिकाई।।
तैसेहिं सुकबि कबित बुध कहहीं। उपजहिं अनत अनत छबि लहहीं।।
भगति हेतु बिधि भवन बिहाई। सुमिरत सारद आवति धाई।।
राम चरित सर बिनु अन्हवाएँ। सो श्रम जाइ न कोटि उपाएँ।।
कबि कोबिद अस हृदयँ बिचारी। गावहिं हरि जस कलि मल हारी।।
कीन्हें प्राकृत जन गुन गाना। सिर धुनि गिरा लगत पछिताना।।
हृदय सिंधु मति सीप समाना। स्वाति सारदा कहहिं सुजाना।।
जौं बरषइ बर बारि बिचारू। होहिं कबित मुकुतामनि चारू।।
दोहा/सोरठा
जुगुति बेधि पुनि पोहिअहिं रामचरित बर ताग।
पहिरहिं सज्जन बिमल उर सोभा अति अनुराग।।11।।
चौपाई
जे जनमे कलिकाल कराला। करतब बायस बेष मराला।।
चलत कुपंथ बेद मग छाँड़े। कपट कलेवर कलि मल भाँड़ें।।
बंचक भगत कहाइ राम के। किंकर कंचन कोह काम के।।
तिन्ह महँ प्रथम रेख जग मोरी। धींग धरमध्वज धंधक धोरी।।
जौं अपने अवगुन सब कहऊँ। बाढ़इ कथा पार नहिं लहऊँ।।
ताते मैं अति अलप बखाने। थोरे महुँ जानिहहिं सयाने।।
समुझि बिबिधि बिधि बिनती मोरी। कोउ न कथा सुनि देइहि खोरी।।
एतेहु पर करिहहिं जे असंका। मोहि ते अधिक ते जड़ मति रंका।।
कबि न होउँ नहिं चतुर कहावउँ। मति अनुरूप राम गुन गावउँ।।
कहँ रघुपति के चरित अपारा। कहँ मति मोरि निरत संसारा।।
जेहिं मारुत गिरि मेरु उड़ाहीं। कहहु तूल केहि लेखे माहीं।।
समुझत अमित राम प्रभुताई। करत कथा मन अति कदराई।।
दोहा/सोरठा
सारद सेस महेस बिधि आगम निगम पुरान।
नेति नेति कहि जासु गुन करहिं निरंतर गान।।12।।
चौपाई
mani mānika mukutā chabi jaisī. ahi giri gaja sira sōha na taisī..
nṛpa kirīṭa tarunī tanu pāī. lahahiṃ sakala sōbhā adhikāī..
taisēhiṃ sukabi kabita budha kahahīṃ. upajahiṃ anata anata chabi lahahīṃ..
bhagati hētu bidhi bhavana bihāī. sumirata sārada āvati dhāī..
rāma carita sara binu anhavāēom. sō śrama jāi na kōṭi upāēom..
kabi kōbida asa hṛdayaom bicārī. gāvahiṃ hari jasa kali mala hārī..
kīnhēṃ prākṛta jana guna gānā. sira dhuni girā lagata pachitānā..
hṛdaya siṃdhu mati sīpa samānā. svāti sāradā kahahiṃ sujānā..
jauṃ baraṣai bara bāri bicārū. hōhiṃ kabita mukutāmani cārū..
चौपाई
jē janamē kalikāla karālā. karataba bāyasa bēṣa marālā..
calata kupaṃtha bēda maga chāomḍaē. kapaṭa kalēvara kali mala bhāomḍaēṃ..
baṃcaka bhagata kahāi rāma kē. kiṃkara kaṃcana kōha kāma kē..
tinha mahaom prathama rēkha jaga mōrī. dhīṃga dharamadhvaja dhaṃdhaka dhōrī..
jauṃ apanē avaguna saba kahaūom. bāḍhai kathā pāra nahiṃ lahaūom..
tātē maiṃ ati alapa bakhānē. thōrē mahuom jānihahiṃ sayānē..
samujhi bibidhi bidhi binatī mōrī. kōu na kathā suni dēihi khōrī..
ētēhu para karihahiṃ jē asaṃkā. mōhi tē adhika tē jaḍa mati raṃkā..
kabi na hōuom nahiṃ catura kahāvauom. mati anurūpa rāma guna gāvauom..
kahaom raghupati kē carita apārā. kahaom mati mōri nirata saṃsārā..
jēhiṃ māruta giri mēru uḍaāhīṃ. kahahu tūla kēhi lēkhē māhīṃ..
samujhata amita rāma prabhutāī. karata kathā mana ati kadarāī..
