चौपाई
कासीं मरत जंतु अवलोकी। जासु नाम बल करउँ बिसोकी।।
सोइ प्रभु मोर चराचर स्वामी। रघुबर सब उर अंतरजामी।।
बिबसहुँ जासु नाम नर कहहीं। जनम अनेक रचित अघ दहहीं।।
सादर सुमिरन जे नर करहीं। भव बारिधि गोपद इव तरहीं।।
राम सो परमातमा भवानी। तहँ भ्रम अति अबिहित तव बानी।।
अस संसय आनत उर माहीं। ग्यान बिराग सकल गुन जाहीं।।
सुनि सिव के भ्रम भंजन बचना। मिटि गै सब कुतरक कै रचना।।
भइ रघुपति पद प्रीति प्रतीती। दारुन असंभावना बीती।।
दोहा/सोरठा
पुनि पुनि प्रभु पद कमल गहि जोरि पंकरुह पानि।
बोली गिरिजा बचन बर मनहुँ प्रेम रस सानि।।119।।
चौपाई
ससि कर सम सुनि गिरा तुम्हारी। मिटा मोह सरदातप भारी।।
तुम्ह कृपाल सबु संसउ हरेऊ। राम स्वरुप जानि मोहि परेऊ।।
नाथ कृपाँ अब गयउ बिषादा। सुखी भयउँ प्रभु चरन प्रसादा।।
अब मोहि आपनि किंकरि जानी। जदपि सहज जड नारि अयानी।।
प्रथम जो मैं पूछा सोइ कहहू। जौं मो पर प्रसन्न प्रभु अहहू।।
राम ब्रह्म चिनमय अबिनासी। सर्ब रहित सब उर पुर बासी।।
नाथ धरेउ नरतनु केहि हेतू। मोहि समुझाइ कहहु बृषकेतू।।
उमा बचन सुनि परम बिनीता। रामकथा पर प्रीति पुनीता।।
दोहा/सोरठा
हिंयँ हरषे कामारि तब संकर सहज सुजान
बहु बिधि उमहि प्रसंसि पुनि बोले कृपानिधान।।120(क)।।
सुनु सुभ कथा भवानि रामचरितमानस बिमल।
कहा भुसुंडि बखानि सुना बिहग नायक गरुड।।120(ख)।।
सो संबाद उदार जेहि बिधि भा आगें कहब।
सुनहु राम अवतार चरित परम सुंदर अनघ।।120(ग)।।
हरि गुन नाम अपार कथा रूप अगनित अमित।
मैं निज मति अनुसार कहउँ उमा सादर सुनहु।।120(घ।।
चौपाई
kāsīṃ marata jaṃtu avalōkī. jāsu nāma bala karauom bisōkī..
sōi prabhu mōra carācara svāmī. raghubara saba ura aṃtarajāmī..
bibasahuom jāsu nāma nara kahahīṃ. janama anēka racita agha dahahīṃ..
sādara sumirana jē nara karahīṃ. bhava bāridhi gōpada iva tarahīṃ..
rāma sō paramātamā bhavānī. tahaom bhrama ati abihita tava bānī..
asa saṃsaya ānata ura māhīṃ. gyāna birāga sakala guna jāhīṃ..
suni siva kē bhrama bhaṃjana bacanā. miṭi gai saba kutaraka kai racanā..
bhai raghupati pada prīti pratītī. dāruna asaṃbhāvanā bītī..
चौपाई
sasi kara sama suni girā tumhārī. miṭā mōha saradātapa bhārī..
tumha kṛpāla sabu saṃsau harēū. rāma svarupa jāni mōhi parēū..
nātha kṛpāom aba gayau biṣādā. sukhī bhayauom prabhu carana prasādā..
aba mōhi āpani kiṃkari jānī. jadapi sahaja jaḍa nāri ayānī..
prathama jō maiṃ pūchā sōi kahahū. jauṃ mō para prasanna prabhu ahahū..
rāma brahma cinamaya abināsī. sarba rahita saba ura pura bāsī..
nātha dharēu naratanu kēhi hētū. mōhi samujhāi kahahu bṛṣakētū..
umā bacana suni parama binītā. rāmakathā para prīti punītā..
