चौपाई
सुनु मुनि मोह होइ मन ताकें। ग्यान बिराग हृदय नहिं जाके।।
ब्रह्मचरज ब्रत रत मतिधीरा। तुम्हहि कि करइ मनोभव पीरा।।
नारद कहेउ सहित अभिमाना। कृपा तुम्हारि सकल भगवाना।।
करुनानिधि मन दीख बिचारी। उर अंकुरेउ गरब तरु भारी।।
बेगि सो मै डारिहउँ उखारी। पन हमार सेवक हितकारी।।
मुनि कर हित मम कौतुक होई। अवसि उपाय करबि मै सोई।।
तब नारद हरि पद सिर नाई। चले हृदयँ अहमिति अधिकाई।।
श्रीपति निज माया तब प्रेरी। सुनहु कठिन करनी तेहि केरी।।
दोहा/सोरठा
बिरचेउ मग महुँ नगर तेहिं सत जोजन बिस्तार।
श्रीनिवासपुर तें अधिक रचना बिबिध प्रकार।।129।।
चौपाई
बसहिं नगर सुंदर नर नारी। जनु बहु मनसिज रति तनुधारी।।
तेहिं पुर बसइ सीलनिधि राजा। अगनित हय गय सेन समाजा।।
सत सुरेस सम बिभव बिलासा। रूप तेज बल नीति निवासा।।
बिस्वमोहनी तासु कुमारी। श्री बिमोह जिसु रूपु निहारी।।
सोइ हरिमाया सब गुन खानी। सोभा तासु कि जाइ बखानी।।
करइ स्वयंबर सो नृपबाला। आए तहँ अगनित महिपाला।।
मुनि कौतुकी नगर तेहिं गयऊ। पुरबासिन्ह सब पूछत भयऊ।।
सुनि सब चरित भूपगृहँ आए। करि पूजा नृप मुनि बैठाए।।
दोहा/सोरठा
आनि देखाई नारदहि भूपति राजकुमारि।
कहहु नाथ गुन दोष सब एहि के हृदयँ बिचारि।।130।।
चौपाई
sunu muni mōha hōi mana tākēṃ. gyāna birāga hṛdaya nahiṃ jākē..
brahmacaraja brata rata matidhīrā. tumhahi ki karai manōbhava pīrā..
nārada kahēu sahita abhimānā. kṛpā tumhāri sakala bhagavānā..
karunānidhi mana dīkha bicārī. ura aṃkurēu garaba taru bhārī..
bēgi sō mai ḍārihauom ukhārī. pana hamāra sēvaka hitakārī..
muni kara hita mama kautuka hōī. avasi upāya karabi mai sōī..
taba nārada hari pada sira nāī. calē hṛdayaom ahamiti adhikāī..
śrīpati nija māyā taba prērī. sunahu kaṭhina karanī tēhi kērī..
दोहा/सोरठा
biracēu maga mahuom nagara tēhiṃ sata jōjana bistāra.
śrīnivāsapura tēṃ adhika racanā bibidha prakāra..129..
चौपाई
basahiṃ nagara suṃdara nara nārī. janu bahu manasija rati tanudhārī..
tēhiṃ pura basai sīlanidhi rājā. aganita haya gaya sēna samājā..
sata surēsa sama bibhava bilāsā. rūpa tēja bala nīti nivāsā..
bisvamōhanī tāsu kumārī. śrī bimōha jisu rūpu nihārī..
sōi harimāyā saba guna khānī. sōbhā tāsu ki jāi bakhānī..
karai svayaṃbara sō nṛpabālā. āē tahaom aganita mahipālā..
muni kautukī nagara tēhiṃ gayaū. purabāsinha saba pūchata bhayaū..
suni saba carita bhūpagṛhaom āē. kari pūjā nṛpa muni baiṭhāē..
