चौपाई
सुनु मुनि कथा पुनीत पुरानी। जो गिरिजा प्रति संभु बखानी।।
बिस्व बिदित एक कैकय देसू। सत्यकेतु तहँ बसइ नरेसू।।
धरम धुरंधर नीति निधाना। तेज प्रताप सील बलवाना।।
तेहि कें भए जुगल सुत बीरा। सब गुन धाम महा रनधीरा।।
राज धनी जो जेठ सुत आही। नाम प्रतापभानु अस ताही।।
अपर सुतहि अरिमर्दन नामा। भुजबल अतुल अचल संग्रामा।।
भाइहि भाइहि परम समीती। सकल दोष छल बरजित प्रीती।।
जेठे सुतहि राज नृप दीन्हा। हरि हित आपु गवन बन कीन्हा।।
दोहा/सोरठा
जब प्रतापरबि भयउ नृप फिरी दोहाई देस।
प्रजा पाल अति बेदबिधि कतहुँ नहीं अघ लेस।।153।।
चौपाई
नृप हितकारक सचिव सयाना। नाम धरमरुचि सुक्र समाना।।
सचिव सयान बंधु बलबीरा। आपु प्रतापपुंज रनधीरा।।
सेन संग चतुरंग अपारा। अमित सुभट सब समर जुझारा।।
सेन बिलोकि राउ हरषाना। अरु बाजे गहगहे निसाना।।
बिजय हेतु कटकई बनाई। सुदिन साधि नृप चलेउ बजाई।।
जँह तहँ परीं अनेक लराईं। जीते सकल भूप बरिआई।।
सप्त दीप भुजबल बस कीन्हे। लै लै दंड छाड़ि नृप दीन्हें।।
सकल अवनि मंडल तेहि काला। एक प्रतापभानु महिपाला।।
दोहा/सोरठा
स्वबस बिस्व करि बाहुबल निज पुर कीन्ह प्रबेसु।
अरथ धरम कामादि सुख सेवइ समयँ नरेसु।।154।।
चौपाई
sunu muni kathā punīta purānī. jō girijā prati saṃbhu bakhānī..
bisva bidita ēka kaikaya dēsū. satyakētu tahaom basai narēsū..
dharama dhuraṃdhara nīti nidhānā. tēja pratāpa sīla balavānā..
tēhi kēṃ bhaē jugala suta bīrā. saba guna dhāma mahā ranadhīrā..
rāja dhanī jō jēṭha suta āhī. nāma pratāpabhānu asa tāhī..
apara sutahi arimardana nāmā. bhujabala atula acala saṃgrāmā..
bhāihi bhāihi parama samītī. sakala dōṣa chala barajita prītī..
jēṭhē sutahi rāja nṛpa dīnhā. hari hita āpu gavana bana kīnhā..
चौपाई
nṛpa hitakāraka saciva sayānā. nāma dharamaruci sukra samānā..
saciva sayāna baṃdhu balabīrā. āpu pratāpapuṃja ranadhīrā..
sēna saṃga caturaṃga apārā. amita subhaṭa saba samara jujhārā..
sēna bilōki rāu haraṣānā. aru bājē gahagahē nisānā..
bijaya hētu kaṭakaī banāī. sudina sādhi nṛpa calēu bajāī..
jaomha tahaom parīṃ anēka larāīṃ. jītē sakala bhūpa bariāī..
sapta dīpa bhujabala basa kīnhē. lai lai daṃḍa chāḍai nṛpa dīnhēṃ..
sakala avani maṃḍala tēhi kālā. ēka pratāpabhānu mahipālā..
