चौपाई
आवत देखि अधिक रव बाजी। चलेउ बराह मरुत गति भाजी।।
तुरत कीन्ह नृप सर संधाना। महि मिलि गयउ बिलोकत बाना।।
तकि तकि तीर महीस चलावा। करि छल सुअर सरीर बचावा।।
प्रगटत दुरत जाइ मृग भागा। रिस बस भूप चलेउ संग लागा।।
गयउ दूरि घन गहन बराहू। जहँ नाहिन गज बाजि निबाहू।।
अति अकेल बन बिपुल कलेसू। तदपि न मृग मग तजइ नरेसू।।
कोल बिलोकि भूप बड़ धीरा। भागि पैठ गिरिगुहाँ गभीरा।।
अगम देखि नृप अति पछिताई। फिरेउ महाबन परेउ भुलाई।।
दोहा/सोरठा
खेद खिन्न छुद्धित तृषित राजा बाजि समेत।
खोजत ब्याकुल सरित सर जल बिनु भयउ अचेत।।157।।
चौपाई
फिरत बिपिन आश्रम एक देखा। तहँ बस नृपति कपट मुनिबेषा।।
जासु देस नृप लीन्ह छड़ाई। समर सेन तजि गयउ पराई।।
समय प्रतापभानु कर जानी। आपन अति असमय अनुमानी।।
गयउ न गृह मन बहुत गलानी। मिला न राजहि नृप अभिमानी।।
रिस उर मारि रंक जिमि राजा। बिपिन बसइ तापस कें साजा।।
तासु समीप गवन नृप कीन्हा। यह प्रतापरबि तेहि तब चीन्हा।।
राउ तृषित नहि सो पहिचाना। देखि सुबेष महामुनि जाना।।
उतरि तुरग तें कीन्ह प्रनामा। परम चतुर न कहेउ निज नामा।।
दोहा/सोरठा
भूपति तृषित बिलोकि तेहिं सरबरु दीन्ह देखाइ।
मज्जन पान समेत हय कीन्ह नृपति हरषाइ।।158।।
चौपाई
āvata dēkhi adhika rava bājī. calēu barāha maruta gati bhājī..
turata kīnha nṛpa sara saṃdhānā. mahi mili gayau bilōkata bānā..
taki taki tīra mahīsa calāvā. kari chala suara sarīra bacāvā..
pragaṭata durata jāi mṛga bhāgā. risa basa bhūpa calēu saṃga lāgā..
gayau dūri ghana gahana barāhū. jahaom nāhina gaja bāji nibāhū..
ati akēla bana bipula kalēsū. tadapi na mṛga maga tajai narēsū..
kōla bilōki bhūpa baḍa dhīrā. bhāgi paiṭha giriguhāom gabhīrā..
agama dēkhi nṛpa ati pachitāī. phirēu mahābana parēu bhulāī..
चौपाई
phirata bipina āśrama ēka dēkhā. tahaom basa nṛpati kapaṭa munibēṣā..
jāsu dēsa nṛpa līnha chaḍaāī. samara sēna taji gayau parāī..
samaya pratāpabhānu kara jānī. āpana ati asamaya anumānī..
gayau na gṛha mana bahuta galānī. milā na rājahi nṛpa abhimānī..
risa ura māri raṃka jimi rājā. bipina basai tāpasa kēṃ sājā..
tāsu samīpa gavana nṛpa kīnhā. yaha pratāparabi tēhi taba cīnhā..
rāu tṛṣita nahi sō pahicānā. dēkhi subēṣa mahāmuni jānā..
utari turaga tēṃ kīnha pranāmā. parama catura na kahēu nija nāmā..
