चौपाई
कह नृप जे बिग्यान निधाना। तुम्ह सारिखे गलित अभिमाना।।
सदा रहहि अपनपौ दुराएँ। सब बिधि कुसल कुबेष बनाएँ।।
तेहि तें कहहि संत श्रुति टेरें। परम अकिंचन प्रिय हरि केरें।।
तुम्ह सम अधन भिखारि अगेहा। होत बिरंचि सिवहि संदेहा।।
जोसि सोसि तव चरन नमामी। मो पर कृपा करिअ अब स्वामी।।
सहज प्रीति भूपति कै देखी। आपु बिषय बिस्वास बिसेषी।।
सब प्रकार राजहि अपनाई। बोलेउ अधिक सनेह जनाई।।
सुनु सतिभाउ कहउँ महिपाला। इहाँ बसत बीते बहु काला।।
दोहा/सोरठा
अब लगि मोहि न मिलेउ कोउ मैं न जनावउँ काहु।
लोकमान्यता अनल सम कर तप कानन दाहु।।161(क)।।
तुलसी देखि सुबेषु भूलहिं मूढ़ न चतुर नर।
सुंदर केकिहि पेखु बचन सुधा सम असन अहि।।161(ख)।।
चौपाई
तातें गुपुत रहउँ जग माहीं। हरि तजि किमपि प्रयोजन नाहीं।।
प्रभु जानत सब बिनहिं जनाएँ। कहहु कवनि सिधि लोक रिझाएँ।।
तुम्ह सुचि सुमति परम प्रिय मोरें। प्रीति प्रतीति मोहि पर तोरें।।
अब जौं तात दुरावउँ तोही। दारुन दोष घटइ अति मोही।।
जिमि जिमि तापसु कथइ उदासा। तिमि तिमि नृपहि उपज बिस्वासा।।
देखा स्वबस कर्म मन बानी। तब बोला तापस बगध्यानी।।
नाम हमार एकतनु भाई। सुनि नृप बोले पुनि सिरु नाई।।
कहहु नाम कर अरथ बखानी। मोहि सेवक अति आपन जानी।।
दोहा/सोरठा
आदिसृष्टि उपजी जबहिं तब उतपति भै मोरि।
नाम एकतनु हेतु तेहि देह न धरी बहोरि।।162।।
चौपाई
kaha nṛpa jē bigyāna nidhānā. tumha sārikhē galita abhimānā..
sadā rahahi apanapau durāēom. saba bidhi kusala kubēṣa banāēom..
tēhi tēṃ kahahi saṃta śruti ṭērēṃ. parama akiṃcana priya hari kērēṃ..
tumha sama adhana bhikhāri agēhā. hōta biraṃci sivahi saṃdēhā..
jōsi sōsi tava carana namāmī. mō para kṛpā karia aba svāmī..
sahaja prīti bhūpati kai dēkhī. āpu biṣaya bisvāsa bisēṣī..
saba prakāra rājahi apanāī. bōlēu adhika sanēha janāī..
sunu satibhāu kahauom mahipālā. ihāom basata bītē bahu kālā..
चौपाई
tātēṃ guputa rahauom jaga māhīṃ. hari taji kimapi prayōjana nāhīṃ..
prabhu jānata saba binahiṃ janāēom. kahahu kavani sidhi lōka rijhāēom..
tumha suci sumati parama priya mōrēṃ. prīti pratīti mōhi para tōrēṃ..
aba jauṃ tāta durāvauom tōhī. dāruna dōṣa ghaṭai ati mōhī..
jimi jimi tāpasu kathai udāsā. timi timi nṛpahi upaja bisvāsā..
dēkhā svabasa karma mana bānī. taba bōlā tāpasa bagadhyānī..
nāma hamāra ēkatanu bhāī. suni nṛpa bōlē puni siru nāī..
kahahu nāma kara aratha bakhānī. mōhi sēvaka ati āpana jānī..
