चौपाई
कीन्ही प्रीति कछु बीच न राखा। लछमिन राम चरित सब भाषा।।
कह सुग्रीव नयन भरि बारी। मिलिहि नाथ मिथिलेसकुमारी।।
मंत्रिन्ह सहित इहाँ एक बारा। बैठ रहेउँ मैं करत बिचारा।।
गगन पंथ देखी मैं जाता। परबस परी बहुत बिलपाता।।
राम राम हा राम पुकारी। हमहि देखि दीन्हेउ पट डारी।।
मागा राम तुरत तेहिं दीन्हा। पट उर लाइ सोच अति कीन्हा।।
कह सुग्रीव सुनहु रघुबीरा। तजहु सोच मन आनहु धीरा।।
सब प्रकार करिहउँ सेवकाई। जेहि बिधि मिलिहि जानकी आई।।
दोहा/सोरठा
सखा बचन सुनि हरषे कृपासिधु बलसींव।
कारन कवन बसहु बन मोहि कहहु सुग्रीव ।।5।।
चौपाई
नात बालि अरु मैं द्वौ भाई। प्रीति रही कछु बरनि न जाई।।
मय सुत मायावी तेहि नाऊँ। आवा सो प्रभु हमरें गाऊँ।।
अर्ध राति पुर द्वार पुकारा। बाली रिपु बल सहै न पारा।।
धावा बालि देखि सो भागा। मैं पुनि गयउँ बंधु सँग लागा।।
गिरिबर गुहाँ पैठ सो जाई। तब बालीं मोहि कहा बुझाई।।
परिखेसु मोहि एक पखवारा। नहिं आवौं तब जानेसु मारा।।
मास दिवस तहँ रहेउँ खरारी। निसरी रुधिर धार तहँ भारी।।
बालि हतेसि मोहि मारिहि आई। सिला देइ तहँ चलेउँ पराई।।
मंत्रिन्ह पुर देखा बिनु साईं। दीन्हेउ मोहि राज बरिआई।।
बालि ताहि मारि गृह आवा। देखि मोहि जियँ भेद बढ़ावा।।
रिपु सम मोहि मारेसि अति भारी। हरि लीन्हेसि सर्बसु अरु नारी।।
ताकें भय रघुबीर कृपाला। सकल भुवन मैं फिरेउँ बिहाला।।
इहाँ साप बस आवत नाहीं। तदपि सभीत रहउँ मन माहीं।।
सुनि सेवक दुख दीनदयाला। फरकि उठीं द्वै भुजा बिसाला।।
दोहा/सोरठा
सुनु सुग्रीव मारिहउँ बालिहि एकहिं बान।
ब्रम्ह रुद्र सरनागत गएँ न उबरिहिं प्रान।।6।।
चौपाई
kīnhī prīti kachu bīca na rākhā. lachamina rāma carita saba bhāṣā..
kaha sugrīva nayana bhari bārī. milihi nātha mithilēsakumārī..
maṃtrinha sahita ihāom ēka bārā. baiṭha rahēuom maiṃ karata bicārā..
gagana paṃtha dēkhī maiṃ jātā. parabasa parī bahuta bilapātā..
rāma rāma hā rāma pukārī. hamahi dēkhi dīnhēu paṭa ḍārī..
māgā rāma turata tēhiṃ dīnhā. paṭa ura lāi sōca ati kīnhā..
kaha sugrīva sunahu raghubīrā. tajahu sōca mana ānahu dhīrā..
saba prakāra karihauom sēvakāī. jēhi bidhi milihi jānakī āī..
चौपाई
nāta bāli aru maiṃ dvau bhāī. prīti rahī kachu barani na jāī..
maya suta māyāvī tēhi nāūom. āvā sō prabhu hamarēṃ gāūom..
ardha rāti pura dvāra pukārā. bālī ripu bala sahai na pārā..
dhāvā bāli dēkhi sō bhāgā. maiṃ puni gayauom baṃdhu saomga lāgā..
giribara guhāom paiṭha sō jāī. taba bālīṃ mōhi kahā bujhāī..
parikhēsu mōhi ēka pakhavārā. nahiṃ āvauṃ taba jānēsu mārā..
māsa divasa tahaom rahēuom kharārī. nisarī rudhira dhāra tahaom bhārī..
bāli hatēsi mōhi mārihi āī. silā dēi tahaom calēuom parāī..
maṃtrinha pura dēkhā binu sāīṃ. dīnhēu mōhi rāja bariāī..
bāli tāhi māri gṛha āvā. dēkhi mōhi jiyaom bhēda baḍhaāvā..
ripu sama mōhi mārēsi ati bhārī. hari līnhēsi sarbasu aru nārī..
tākēṃ bhaya raghubīra kṛpālā. sakala bhuvana maiṃ phirēuom bihālā..
ihāom sāpa basa āvata nāhīṃ. tadapi sabhīta rahauom mana māhīṃ..
suni sēvaka dukha dīnadayālā. pharaki uṭhīṃ dvai bhujā bisālā..
