चौपाई
तुम्हरे कटक माझ सुनु अंगद। मो सन भिरिहि कवन जोधा बद।।
तव प्रभु नारि बिरहँ बलहीना। अनुज तासु दुख दुखी मलीना।।
तुम्ह सुग्रीव कूलद्रुम दोऊ। अनुज हमार भीरु अति सोऊ।।
जामवंत मंत्री अति बूढ़ा। सो कि होइ अब समरारूढ़ा।।
सिल्पि कर्म जानहिं नल नीला। है कपि एक महा बलसीला।।
आवा प्रथम नगरु जेंहिं जारा। सुनत बचन कह बालिकुमारा।।
सत्य बचन कहु निसिचर नाहा। साँचेहुँ कीस कीन्ह पुर दाहा।।
रावन नगर अल्प कपि दहई। सुनि अस बचन सत्य को कहई।।
जो अति सुभट सराहेहु रावन। सो सुग्रीव केर लघु धावन।।
चलइ बहुत सो बीर न होई। पठवा खबरि लेन हम सोई।।
दोहा/सोरठा
सत्य नगरु कपि जारेउ बिनु प्रभु आयसु पाइ।
फिरि न गयउ सुग्रीव पहिं तेहिं भय रहा लुकाइ।।23(क)।।
सत्य कहहि दसकंठ सब मोहि न सुनि कछु कोह।
कोउ न हमारें कटक अस तो सन लरत जो सोह।।23(ख)।।
प्रीति बिरोध समान सन करिअ नीति असि आहि।
जौं मृगपति बध मेड़ुकन्हि भल कि कहइ कोउ ताहि।।23(ग)।।
जद्यपि लघुता राम कहुँ तोहि बधें बड़ दोष।
तदपि कठिन दसकंठ सुनु छत्र जाति कर रोष।।23(घ)।।
बक्र उक्ति धनु बचन सर हृदय दहेउ रिपु कीस।
प्रतिउत्तर सड़सिन्ह मनहुँ काढ़त भट दससीस।।23(ङ)।।
हँसि बोलेउ दसमौलि तब कपि कर बड़ गुन एक।
जो प्रतिपालइ तासु हित करइ उपाय अनेक।।23(छ)।।
चौपाई
धन्य कीस जो निज प्रभु काजा। जहँ तहँ नाचइ परिहरि लाजा।।
नाचि कूदि करि लोग रिझाई। पति हित करइ धर्म निपुनाई।।
अंगद स्वामिभक्त तव जाती। प्रभु गुन कस न कहसि एहि भाँती।।
मैं गुन गाहक परम सुजाना। तव कटु रटनि करउँ नहिं काना।।
कह कपि तव गुन गाहकताई। सत्य पवनसुत मोहि सुनाई।।
बन बिधंसि सुत बधि पुर जारा। तदपि न तेहिं कछु कृत अपकारा।।
सोइ बिचारि तव प्रकृति सुहाई। दसकंधर मैं कीन्हि ढिठाई।।
देखेउँ आइ जो कछु कपि भाषा। तुम्हरें लाज न रोष न माखा।।
जौं असि मति पितु खाए कीसा। कहि अस बचन हँसा दससीसा।।
पितहि खाइ खातेउँ पुनि तोही। अबहीं समुझि परा कछु मोही।।
बालि बिमल जस भाजन जानी। हतउँ न तोहि अधम अभिमानी।।
कहु रावन रावन जग केते। मैं निज श्रवन सुने सुनु जेते।।
बलिहि जितन एक गयउ पताला। राखेउ बाँधि सिसुन्ह हयसाला।।
खेलहिं बालक मारहिं जाई। दया लागि बलि दीन्ह छोड़ाई।।
एक बहोरि सहसभुज देखा। धाइ धरा जिमि जंतु बिसेषा।।
कौतुक लागि भवन लै आवा। सो पुलस्ति मुनि जाइ छोड़ावा।।
दोहा/सोरठा
एक कहत मोहि सकुच अति रहा बालि की काँख।
इन्ह महुँ रावन तैं कवन सत्य बदहि तजि माख।।24।।
चौपाई
tumharē kaṭaka mājha sunu aṃgada. mō sana bhirihi kavana jōdhā bada..
tava prabhu nāri birahaom balahīnā. anuja tāsu dukha dukhī malīnā..
tumha sugrīva kūladruma dōū. anuja hamāra bhīru ati sōū..
jāmavaṃta maṃtrī ati būḍhaā. sō ki hōi aba samarārūḍhaā..
silpi karma jānahiṃ nala nīlā. hai kapi ēka mahā balasīlā..
āvā prathama nagaru jēṃhiṃ jārā. sunata bacana kaha bālikumārā..
satya bacana kahu nisicara nāhā. sāomcēhuom kīsa kīnha pura dāhā..
rāvana nagara alpa kapi dahaī. suni asa bacana satya kō kahaī..
jō ati subhaṭa sarāhēhu rāvana. sō sugrīva kēra laghu dhāvana..
calai bahuta sō bīra na hōī. paṭhavā khabari lēna hama sōī..
चौपाई
dhanya kīsa jō nija prabhu kājā. jahaom tahaom nācai parihari lājā..
nāci kūdi kari lōga rijhāī. pati hita karai dharma nipunāī..
aṃgada svāmibhakta tava jātī. prabhu guna kasa na kahasi ēhi bhāomtī..
maiṃ guna gāhaka parama sujānā. tava kaṭu raṭani karauom nahiṃ kānā..
kaha kapi tava guna gāhakatāī. satya pavanasuta mōhi sunāī..
bana bidhaṃsi suta badhi pura jārā. tadapi na tēhiṃ kachu kṛta apakārā..
sōi bicāri tava prakṛti suhāī. dasakaṃdhara maiṃ kīnhi ḍhiṭhāī..
dēkhēuom āi jō kachu kapi bhāṣā. tumharēṃ lāja na rōṣa na mākhā..
jauṃ asi mati pitu khāē kīsā. kahi asa bacana haomsā dasasīsā..
pitahi khāi khātēuom puni tōhī. abahīṃ samujhi parā kachu mōhī..
bāli bimala jasa bhājana jānī. hatauom na tōhi adhama abhimānī..
kahu rāvana rāvana jaga kētē. maiṃ nija śravana sunē sunu jētē..
balihi jitana ēka gayau patālā. rākhēu bāomdhi sisunha hayasālā..
khēlahiṃ bālaka mārahiṃ jāī. dayā lāgi bali dīnha chōḍaāī..
ēka bahōri sahasabhuja dēkhā. dhāi dharā jimi jaṃtu bisēṣā..
kautuka lāgi bhavana lai āvā. sō pulasti muni jāi chōḍaāvā..
