चौपाई
कहहिं सचिव सठ ठकुरसोहाती। नाथ न पूर आव एहि भाँती।।
बारिधि नाघि एक कपि आवा। तासु चरित मन महुँ सबु गावा।।
छुधा न रही तुम्हहि तब काहू। जारत नगरु कस न धरि खाहू।।
सुनत नीक आगें दुख पावा। सचिवन अस मत प्रभुहि सुनावा।।
जेहिं बारीस बँधायउ हेला। उतरेउ सेन समेत सुबेला।।
सो भनु मनुज खाब हम भाई। बचन कहहिं सब गाल फुलाई।।
तात बचन मम सुनु अति आदर। जनि मन गुनहु मोहि करि कादर।।
प्रिय बानी जे सुनहिं जे कहहीं। ऐसे नर निकाय जग अहहीं।।
बचन परम हित सुनत कठोरे। सुनहिं जे कहहिं ते नर प्रभु थोरे।।
प्रथम बसीठ पठउ सुनु नीती। सीता देइ करहु पुनि प्रीती।।
दोहा/सोरठा
नारि पाइ फिरि जाहिं जौं तौ न बढ़ाइअ रारि।
नाहिं त सन्मुख समर महि तात करिअ हठि मारि।।9।।
चौपाई
यह मत जौं मानहु प्रभु मोरा। उभय प्रकार सुजसु जग तोरा।।
सुत सन कह दसकंठ रिसाई। असि मति सठ केहिं तोहि सिखाई।।
अबहीं ते उर संसय होई। बेनुमूल सुत भयहु घमोई।।
सुनि पितु गिरा परुष अति घोरा। चला भवन कहि बचन कठोरा।।
हित मत तोहि न लागत कैसें। काल बिबस कहुँ भेषज जैसें।।
संध्या समय जानि दससीसा। भवन चलेउ निरखत भुज बीसा।।
लंका सिखर उपर आगारा। अति बिचित्र तहँ होइ अखारा।।
बैठ जाइ तेही मंदिर रावन। लागे किंनर गुन गन गावन।।
बाजहिं ताल पखाउज बीना। नृत्य करहिं अपछरा प्रबीना।।
दोहा/सोरठा
सुनासीर सत सरिस सो संतत करइ बिलास।
परम प्रबल रिपु सीस पर तद्यपि सोच न त्रास।।10।।
चौपाई
kahahiṃ saciva saṭha ṭhakurasōhātī. nātha na pūra āva ēhi bhāomtī..
bāridhi nāghi ēka kapi āvā. tāsu carita mana mahuom sabu gāvā..
chudhā na rahī tumhahi taba kāhū. jārata nagaru kasa na dhari khāhū..
sunata nīka āgēṃ dukha pāvā. sacivana asa mata prabhuhi sunāvā..
jēhiṃ bārīsa baomdhāyau hēlā. utarēu sēna samēta subēlā..
sō bhanu manuja khāba hama bhāī. bacana kahahiṃ saba gāla phulāī..
tāta bacana mama sunu ati ādara. jani mana gunahu mōhi kari kādara..
priya bānī jē sunahiṃ jē kahahīṃ. aisē nara nikāya jaga ahahīṃ..
bacana parama hita sunata kaṭhōrē. sunahiṃ jē kahahiṃ tē nara prabhu thōrē..
prathama basīṭha paṭhau sunu nītī. sītā dēi karahu puni prītī..
चौपाई
yaha mata jauṃ mānahu prabhu mōrā. ubhaya prakāra sujasu jaga tōrā..
suta sana kaha dasakaṃṭha risāī. asi mati saṭha kēhiṃ tōhi sikhāī..
abahīṃ tē ura saṃsaya hōī. bēnumūla suta bhayahu ghamōī..
suni pitu girā paruṣa ati ghōrā. calā bhavana kahi bacana kaṭhōrā..
hita mata tōhi na lāgata kaisēṃ. kāla bibasa kahuom bhēṣaja jaisēṃ..
saṃdhyā samaya jāni dasasīsā. bhavana calēu nirakhata bhuja bīsā..
laṃkā sikhara upara āgārā. ati bicitra tahaom hōi akhārā..
baiṭha jāi tēhī maṃdira rāvana. lāgē kiṃnara guna gana gāvana..
bājahiṃ tāla pakhāuja bīnā. nṛtya karahiṃ apacharā prabīnā..
