चौपाई
तेही निसि सीता पहिं जाई। त्रिजटा कहि सब कथा सुनाई।।
सिर भुज बाढ़ि सुनत रिपु केरी। सीता उर भइ त्रास घनेरी।।
मुख मलीन उपजी मन चिंता। त्रिजटा सन बोली तब सीता।।
होइहि कहा कहसि किन माता। केहि बिधि मरिहि बिस्व दुखदाता।।
रघुपति सर सिर कटेहुँ न मरई। बिधि बिपरीत चरित सब करई।।
मोर अभाग्य जिआवत ओही। जेहिं हौ हरि पद कमल बिछोही।।
जेहिं कृत कपट कनक मृग झूठा। अजहुँ सो दैव मोहि पर रूठा।।
जेहिं बिधि मोहि दुख दुसह सहाए। लछिमन कहुँ कटु बचन कहाए।।
रघुपति बिरह सबिष सर भारी। तकि तकि मार बार बहु मारी।।
ऐसेहुँ दुख जो राख मम प्राना। सोइ बिधि ताहि जिआव न आना।।
बहु बिधि कर बिलाप जानकी। करि करि सुरति कृपानिधान की।।
कह त्रिजटा सुनु राजकुमारी। उर सर लागत मरइ सुरारी।।
प्रभु ताते उर हतइ न तेही। एहि के हृदयँ बसति बैदेही।।
चौपाई
अस कहि बहुत भाँति समुझाई। पुनि त्रिजटा निज भवन सिधाई।।
राम सुभाउ सुमिरि बैदेही। उपजी बिरह बिथा अति तेही।।
निसिहि ससिहि निंदति बहु भाँती। जुग सम भई सिराति न राती।।
करति बिलाप मनहिं मन भारी। राम बिरहँ जानकी दुखारी।।
जब अति भयउ बिरह उर दाहू। फरकेउ बाम नयन अरु बाहू।।
सगुन बिचारि धरी मन धीरा। अब मिलिहहिं कृपाल रघुबीरा।।
इहाँ अर्धनिसि रावनु जागा। निज सारथि सन खीझन लागा।।
सठ रनभूमि छड़ाइसि मोही। धिग धिग अधम मंदमति तोही।।
तेहिं पद गहि बहु बिधि समुझावा। भौरु भएँ रथ चढ़ि पुनि धावा।।
सुनि आगवनु दसानन केरा। कपि दल खरभर भयउ घनेरा।।
जहँ तहँ भूधर बिटप उपारी। धाए कटकटाइ भट भारी।।
चौपाई
tēhī nisi sītā pahiṃ jāī. trijaṭā kahi saba kathā sunāī..
sira bhuja bāḍhai sunata ripu kērī. sītā ura bhai trāsa ghanērī..
mukha malīna upajī mana ciṃtā. trijaṭā sana bōlī taba sītā..
hōihi kahā kahasi kina mātā. kēhi bidhi marihi bisva dukhadātā..
raghupati sara sira kaṭēhuom na maraī. bidhi biparīta carita saba karaī..
mōra abhāgya jiāvata ōhī. jēhiṃ hau hari pada kamala bichōhī..
jēhiṃ kṛta kapaṭa kanaka mṛga jhūṭhā. ajahuom sō daiva mōhi para rūṭhā..
jēhiṃ bidhi mōhi dukha dusaha sahāē. lachimana kahuom kaṭu bacana kahāē..
raghupati biraha sabiṣa sara bhārī. taki taki māra bāra bahu mārī..
aisēhuom dukha jō rākha mama prānā. sōi bidhi tāhi jiāva na ānā..
bahu bidhi kara bilāpa jānakī. kari kari surati kṛpānidhāna kī..
kaha trijaṭā sunu rājakumārī. ura sara lāgata marai surārī..
prabhu tātē ura hatai na tēhī. ēhi kē hṛdayaom basati baidēhī..
चौपाई
asa kahi bahuta bhāomti samujhāī. puni trijaṭā nija bhavana sidhāī..
rāma subhāu sumiri baidēhī. upajī biraha bithā ati tēhī..
nisihi sasihi niṃdati bahu bhāomtī. juga sama bhaī sirāti na rātī..
karati bilāpa manahiṃ mana bhārī. rāma birahaom jānakī dukhārī..
jaba ati bhayau biraha ura dāhū. pharakēu bāma nayana aru bāhū..
saguna bicāri dharī mana dhīrā. aba milihahiṃ kṛpāla raghubīrā..
ihāom ardhanisi rāvanu jāgā. nija sārathi sana khījhana lāgā..
saṭha ranabhūmi chaḍaāisi mōhī. dhiga dhiga adhama maṃdamati tōhī..
tēhiṃ pada gahi bahu bidhi samujhāvā. bhauru bhaēom ratha caḍhai puni dhāvā..
suni āgavanu dasānana kērā. kapi dala kharabhara bhayau ghanērā..
jahaom tahaom bhūdhara biṭapa upārī. dhāē kaṭakaṭāi bhaṭa bhārī..
