चौपाई
मातु मोहि दीजे कछु चीन्हा। जैसें रघुनायक मोहि दीन्हा।।
चूड़ामनि उतारि तब दयऊ। हरष समेत पवनसुत लयऊ।।
कहेहु तात अस मोर प्रनामा। सब प्रकार प्रभु पूरनकामा।।
दीन दयाल बिरिदु संभारी। हरहु नाथ मम संकट भारी।।
तात सक्रसुत कथा सुनाएहु। बान प्रताप प्रभुहि समुझाएहु।।
मास दिवस महुँ नाथु न आवा। तौ पुनि मोहि जिअत नहिं पावा।।
कहु कपि केहि बिधि राखौं प्राना। तुम्हहू तात कहत अब जाना।।
तोहि देखि सीतलि भइ छाती। पुनि मो कहुँ सोइ दिनु सो राती।।
दोहा/सोरठा
जनकसुतहि समुझाइ करि बहु बिधि धीरजु दीन्ह।
चरन कमल सिरु नाइ कपि गवनु राम पहिं कीन्ह।।27।।
चौपाई
चलत महाधुनि गर्जेसि भारी। गर्भ स्त्रवहिं सुनि निसिचर नारी।।
नाघि सिंधु एहि पारहि आवा। सबद किलकिला कपिन्ह सुनावा।।
हरषे सब बिलोकि हनुमाना। नूतन जन्म कपिन्ह तब जाना।।
मुख प्रसन्न तन तेज बिराजा। कीन्हेसि रामचन्द्र कर काजा।।
मिले सकल अति भए सुखारी। तलफत मीन पाव जिमि बारी।।
चले हरषि रघुनायक पासा। पूँछत कहत नवल इतिहासा।।
तब मधुबन भीतर सब आए। अंगद संमत मधु फल खाए।।
रखवारे जब बरजन लागे। मुष्टि प्रहार हनत सब भागे।।
दोहा/सोरठा
जाइ पुकारे ते सब बन उजार जुबराज।
सुनि सुग्रीव हरष कपि करि आए प्रभु काज।।28।।
चौपाई
mātu mōhi dījē kachu cīnhā. jaisēṃ raghunāyaka mōhi dīnhā..
cūḍaāmani utāri taba dayaū. haraṣa samēta pavanasuta layaū..
kahēhu tāta asa mōra pranāmā. saba prakāra prabhu pūranakāmā..
dīna dayāla biridu saṃbhārī. harahu nātha mama saṃkaṭa bhārī..
tāta sakrasuta kathā sunāēhu. bāna pratāpa prabhuhi samujhāēhu..
māsa divasa mahuom nāthu na āvā. tau puni mōhi jiata nahiṃ pāvā..
kahu kapi kēhi bidhi rākhauṃ prānā. tumhahū tāta kahata aba jānā..
tōhi dēkhi sītali bhai chātī. puni mō kahuom sōi dinu sō rātī..
चौपाई
calata mahādhuni garjēsi bhārī. garbha stravahiṃ suni nisicara nārī..
nāghi siṃdhu ēhi pārahi āvā. sabada kilakilā kapinha sunāvā..
haraṣē saba bilōki hanumānā. nūtana janma kapinha taba jānā..
mukha prasanna tana tēja birājā. kīnhēsi rāmacandra kara kājā..
milē sakala ati bhaē sukhārī. talaphata mīna pāva jimi bārī..
calē haraṣi raghunāyaka pāsā. pūomchata kahata navala itihāsā..
taba madhubana bhītara saba āē. aṃgada saṃmata madhu phala khāē..
rakhavārē jaba barajana lāgē. muṣṭi prahāra hanata saba bhāgē..
