चौपाई
रहेउ एक दिन अवधि अधारा। समुझत मन दुख भयउ अपारा।।
कारन कवन नाथ नहिं आयउ। जानि कुटिल किधौं मोहि बिसरायउ।।
अहह धन्य लछिमन बड़भागी। राम पदारबिंदु अनुरागी।।
कपटी कुटिल मोहि प्रभु चीन्हा। ताते नाथ संग नहिं लीन्हा।।
जौं करनी समुझै प्रभु मोरी। नहिं निस्तार कलप सत कोरी।।
जन अवगुन प्रभु मान न काऊ। दीन बंधु अति मृदुल सुभाऊ।।
मोरि जियँ भरोस दृढ़ सोई। मिलिहहिं राम सगुन सुभ होई।।
बीतें अवधि रहहि जौं प्राना। अधम कवन जग मोहि समाना।।
चौपाई
देखत हनूमान अति हरषेउ। पुलक गात लोचन जल बरषेउ।।
मन महँ बहुत भाँति सुख मानी। बोलेउ श्रवन सुधा सम बानी।।
जासु बिरहँ सोचहु दिन राती। रटहु निरंतर गुन गन पाँती।।
रघुकुल तिलक सुजन सुखदाता। आयउ कुसल देव मुनि त्राता।।
रिपु रन जीति सुजस सुर गावत। सीता सहित अनुज प्रभु आवत।।
सुनत बचन बिसरे सब दूखा। तृषावंत जिमि पाइ पियूषा।।
को तुम्ह तात कहाँ ते आए। मोहि परम प्रिय बचन सुनाए।।
मारुत सुत मैं कपि हनुमाना। नामु मोर सुनु कृपानिधाना।।
दीनबंधु रघुपति कर किंकर। सुनत भरत भेंटेउ उठि सादर।।
मिलत प्रेम नहिं हृदयँ समाता। नयन स्त्रवत जल पुलकित गाता।।
कपि तव दरस सकल दुख बीते। मिले आजु मोहि राम पिरीते।।
बार बार बूझी कुसलाता। तो कहुँ देउँ काह सुनु भ्राता।।
एहि संदेस सरिस जग माहीं। करि बिचार देखेउँ कछु नाहीं।।
नाहिन तात उरिन मैं तोही। अब प्रभु चरित सुनावहु मोही।।
तब हनुमंत नाइ पद माथा। कहे सकल रघुपति गुन गाथा।।
कहु कपि कबहुँ कृपाल गोसाईं। सुमिरहिं मोहि दास की नाईं।।
चौपाई
rahēu ēka dina avadhi adhārā. samujhata mana dukha bhayau apārā..
kārana kavana nātha nahiṃ āyau. jāni kuṭila kidhauṃ mōhi bisarāyau..
ahaha dhanya lachimana baḍabhāgī. rāma padārabiṃdu anurāgī..
kapaṭī kuṭila mōhi prabhu cīnhā. tātē nātha saṃga nahiṃ līnhā..
jauṃ karanī samujhai prabhu mōrī. nahiṃ nistāra kalapa sata kōrī..
jana avaguna prabhu māna na kāū. dīna baṃdhu ati mṛdula subhāū..
mōri jiyaom bharōsa dṛḍha sōī. milihahiṃ rāma saguna subha hōī..
bītēṃ avadhi rahahi jauṃ prānā. adhama kavana jaga mōhi samānā..
चौपाई
dēkhata hanūmāna ati haraṣēu. pulaka gāta lōcana jala baraṣēu..
mana mahaom bahuta bhāomti sukha mānī. bōlēu śravana sudhā sama bānī..
jāsu birahaom sōcahu dina rātī. raṭahu niraṃtara guna gana pāomtī..
raghukula tilaka sujana sukhadātā. āyau kusala dēva muni trātā..
ripu rana jīti sujasa sura gāvata. sītā sahita anuja prabhu āvata..
sunata bacana bisarē saba dūkhā. tṛṣāvaṃta jimi pāi piyūṣā..
kō tumha tāta kahāom tē āē. mōhi parama priya bacana sunāē..
māruta suta maiṃ kapi hanumānā. nāmu mōra sunu kṛpānidhānā..
dīnabaṃdhu raghupati kara kiṃkara. sunata bharata bhēṃṭēu uṭhi sādara..
milata prēma nahiṃ hṛdayaom samātā. nayana stravata jala pulakita gātā..
kapi tava darasa sakala dukha bītē. milē āju mōhi rāma pirītē..
bāra bāra būjhī kusalātā. tō kahuom dēuom kāha sunu bhrātā..
ēhi saṃdēsa sarisa jaga māhīṃ. kari bicāra dēkhēuom kachu nāhīṃ..
nāhina tāta urina maiṃ tōhī. aba prabhu carita sunāvahu mōhī..
taba hanumaṃta nāi pada māthā. kahē sakala raghupati guna gāthā..
kahu kapi kabahuom kṛpāla gōsāīṃ. sumirahiṃ mōhi dāsa kī nāīṃ..
