चौपाई
आए भरत संग सब लोगा। कृस तन श्रीरघुबीर बियोगा।।
बामदेव बसिष्ठ मुनिनायक। देखे प्रभु महि धरि धनु सायक।।
धाइ धरे गुर चरन सरोरुह। अनुज सहित अति पुलक तनोरुह।।
भेंटि कुसल बूझी मुनिराया। हमरें कुसल तुम्हारिहिं दाया।।
सकल द्विजन्ह मिलि नायउ माथा। धर्म धुरंधर रघुकुलनाथा।।
गहे भरत पुनि प्रभु पद पंकज। नमत जिन्हहि सुर मुनि संकर अज।।
परे भूमि नहिं उठत उठाए। बर करि कृपासिंधु उर लाए।।
स्यामल गात रोम भए ठाढ़े। नव राजीव नयन जल बाढ़े।।
चौपाई
भरतानुज लछिमन पुनि भेंटे। दुसह बिरह संभव दुख मेटे।।
सीता चरन भरत सिरु नावा। अनुज समेत परम सुख पावा।।
प्रभु बिलोकि हरषे पुरबासी। जनित बियोग बिपति सब नासी।।
प्रेमातुर सब लोग निहारी। कौतुक कीन्ह कृपाल खरारी।।
अमित रूप प्रगटे तेहि काला। जथाजोग मिले सबहि कृपाला।।
कृपादृष्टि रघुबीर बिलोकी। किए सकल नर नारि बिसोकी।।
छन महिं सबहि मिले भगवाना। उमा मरम यह काहुँ न जाना।।
एहि बिधि सबहि सुखी करि रामा। आगें चले सील गुन धामा।।
कौसल्यादि मातु सब धाई। निरखि बच्छ जनु धेनु लवाई।।
चौपाई
āē bharata saṃga saba lōgā. kṛsa tana śrīraghubīra biyōgā..
bāmadēva basiṣṭha munināyaka. dēkhē prabhu mahi dhari dhanu sāyaka..
dhāi dharē gura carana sarōruha. anuja sahita ati pulaka tanōruha..
bhēṃṭi kusala būjhī munirāyā. hamarēṃ kusala tumhārihiṃ dāyā..
sakala dvijanha mili nāyau māthā. dharma dhuraṃdhara raghukulanāthā..
gahē bharata puni prabhu pada paṃkaja. namata jinhahi sura muni saṃkara aja..
parē bhūmi nahiṃ uṭhata uṭhāē. bara kari kṛpāsiṃdhu ura lāē..
syāmala gāta rōma bhaē ṭhāḍhaē. nava rājīva nayana jala bāḍhaē..
चौपाई
bharatānuja lachimana puni bhēṃṭē. dusaha biraha saṃbhava dukha mēṭē..
sītā carana bharata siru nāvā. anuja samēta parama sukha pāvā..
prabhu bilōki haraṣē purabāsī. janita biyōga bipati saba nāsī..
prēmātura saba lōga nihārī. kautuka kīnha kṛpāla kharārī..
amita rūpa pragaṭē tēhi kālā. jathājōga milē sabahi kṛpālā..
kṛpādṛṣṭi raghubīra bilōkī. kiē sakala nara nāri bisōkī..
chana mahiṃ sabahi milē bhagavānā. umā marama yaha kāhuom na jānā..
ēhi bidhi sabahi sukhī kari rāmā. āgēṃ calē sīla guna dhāmā..
kausalyādi mātu saba dhāī. nirakhi baccha janu dhēnu lavāī..
